Qazaqstanda tuńǵysh ret baýyrdy almastyrý otasy jasaldy - S. Qaıyrbekova

Bul týraly búgin Astanadaǵy «Densaýlyq saqtaý salasynda áleýmettik mańyzy bar jobalardy iske asyrýda úkimetti emes uıymdardyń róli» atty dóńgelek ústelde Densaýlyq saqtaý mınıstri Salıdat Qaıyrbekova aıtty.

«A. Syzǵanov atyndaǵy ınstıtýttyń bazasynda Qazaqstanda tuńǵysh ret baýyrdy almastyrý otasy jasaldy. Mamandarmen selektorlyq keńes barysynda sóıleskende, olar baýyrdy transplatatsııalaýdyń eń kúrdeli ári aýyr túri bolyp tabylatynyn atap ótti»,-dedi mınıstr. S. Qaıyrbekovanyń sózine qaraǵanda, baýyrdyń oń jaq bóligi úlken ápkesinen sińlisine aýystyrylǵan. «Ekeýi de qazirgi kezde qanaǵattanarlyq jaǵdaıda»,-dep atap ótti vedomstvo basshysy.

Budan buryn habarlaǵanymyzdaı, bıylǵy 8 qarashada Syzǵanov atyndaǵy UHO bas dırektory, professor, RMǴA akademıgi Jetkergen Arzyqulov Qazaqstanda tuńǵysh ret A.N.Syzǵanov atyndaǵy ulttyq ǵylymı hırýrgııa ortalyǵynda júrek pen baýyrdy aýystyrý operatsııalary jasalatynyn málimdegen bolatyn. «Baýyrdy aýystyrýdy jeltoqsan aıyna josparlap otyrmyz. Operatsııalardy shetelde oqyp kelgen biliktiligi joǵary mamandar jasaıtyn bolady. Ol úshin jaqynda Qazaqstannyń 50 shaqty dárigeri alys shetelder men TMD elderine baryp, transplantatsııa jasaýdy úırenip qaıtty»,-dedi ol. Transplantatsııa - memleket úshin ekonomıkalyq jaǵynan tıimdi tásilderdiń biri jáne ol emdeýdiń birden-bir áleýmettik radıkaldy joly bolyp tabylady. «Adamnyń ishki aǵzasyn aýystyrý syrqattyń, ólim aýzynda jatqan adamnyń ómirin saqtap qalýǵa kómektesedi. Búgingi zamanaýı medıtsına bir mezgilde júrek, ókpe, baýyr, sonymen qatar uıqy bezi syndy birneshe aǵzany aýystyrýǵa múmkindik berip otyr. Odan qazirgi medıtsınanyń qanshalyqty damyǵandyǵyn baıqaýǵa bolady»,-dedi J.Arzyqulov.

Ol sonymen qatar: «Qazirgi ýaqytta Qazaqstan Respýblıkasynda shamamen 1200 patsıenttiń júregin aýystyrý, taǵy sonsha adamnyń baýyryn da aýystyrý qajettiligi týyndap otyr. Al, basqa túrli transplantologııa boıynsha operatsııaǵa 4000 -nan 10 000-ǵa deıin patsıent kómekke zárý bolýda»,-dedi. Onyń pikirinshe, medıtsınanyń bul salasyna qoǵamnyń kózqarasyn ózgertý úshin ýaqyt qajet.