Qazaqstanda tuńǵysh ret balalarǵa arnalǵan ulttyq zergerlik áshekeı buıymdary shyǵaryla bastady
ASTANA. 20 qarasha. QazAqparat - Búgin Astanada Qazirgi zamanǵy óner murajaıynda balalardyń zergerlik "Amina jewels" brendiniń uıymdastyrýymen "Qazaq zergerlik óneri balalar júregin jaýlap alýda" atty kórme ashyldy.
Atalmysh ekspozıtsııaǵa elimizdiń zergerlik óneriniń 11 sheberi óz buıymdaryn qoıǵan. Olardyń barlyǵy da "Amina jewels" brendiniń balalar kollektsııasyn jasaýǵa bir kisideı atsalysty. Sonyń negizinde Qazaqstanda tuńǵysh ret balalarǵa arnalǵan zergerlik áshekeı buıymdary shyǵaryla bastady. Kórmede barlyǵy 600-den astam ulttyq naqyshtaǵy jádiger: áıelderge, erlerge jáne balalarǵa arnalǵan baǵaly tastarmen kómkerilgen kúmis áshekeıler, ortaǵasyrlyq qarý-jaraqtar, qaıys belbeýler, qapsyrmalar, kóne turmys zattary usynylyp otyr. Avtorlardyń árbir jumysy erekshe, ózindik stıli bar, qaıtalanbas mánerde oryndalǵan.
"Búgin "Amina jewels" kompanııasy birinshi ret elimizdiń ataqty jáne zergerlik ónerin jańa tanı bastaǵan zergerlerdiń avtorlyq jumystaryn biriktirip otyr. Sheberler balalar men jasóspirimderge arnalǵan buıymdardy qazaq zergerlik óneriniń bar qadir-qasıetin qoldana otyryp jasady. Bul áshekeıler dekor elementteri ǵana emes, sondaı-aq jas urpaqqa kóshpendilerdiń turmys-tirshiligin áńgimeleıdi. Ata-babalarymyzdan bizge qupııa belgiler qalǵan: shıyrshyqtar, ırekter jáne órnekter. Ańyzdardyń bireýi boıynsha bul sımvoldardyń jıyntyǵy bále-jaladan saqtap, adamǵa qorǵan bolady. Bul belgiler balalardyń buıymdarynda jıi kezdesedi", - deıdi joba avtory Ámına Shoqparova.
