Qazaqstanda tuńǵysh ret aýtızmge shaldyqqan balalardy emdeýge arnalǵan keshendi ortalyq ashyldy (FOTO)
ALMATY. QazAqparat - Almatyda búgin aýtızmge shaldyqqan balalardy emdeýge arnalǵan ortalyq ashyldy. Bul ortalyqta bir ýaqytta 90 balaǵa kómek kórsetiledi. Munda júıke dertine shaldyqqan balalar 6 aı tolyq ońaltý kýrsynan óte alady.
Balamen 4 maman: defektolog, logoped, psıholog, áleýmettik pedagog jumys jasaıdy. Aıta ketý kerek, qyrkúıek aıynda osyndaı ortalyq - Astanada, 2016 jyly Óskemen men Qyzylorda qalalarynda ashylatyn bolady. Barlyq ortalyqtar balalardy tegin qabyldaıdy.
«Biz aýtızmge shaldyqqan balalardyń áleýmettenýi men tolyqqandy ómir súrýine kómektesemiz. Qazaqstanda mundaı álemdik deńgeıdegi ortalyqtar joq. Ortalyq «Aýtızm. Barshańyzǵa bir álem» baǵdarlamasy boıynsha jumys jasaıdy. Alǵashqy úsh jylda eń az degende 1000 otbasyǵa kómek kórsetemiz», - dedi «Altyn mıras» qorynyń dıretkory Marat Aıtmaǵambetov.
«Ortalyqta Qazaqstannyń jetekshi sarapshylarynan dáris alǵan, shetelik ozyq tehnologııamen tanys, 40 psıholog pen pedagogtan turatyn kúshti komanda jumys jasap jatyr. Baǵdarlama barysynda jeke ortalyqtar úshin mamandar oqytý, Qazaqstan boıynsha mamandardyń metodologııalyq jáne tájirıbelik bilimderin kóbeıtý josparlanǵan», - dedi aýtızmge shaldyqqan balalardyń ata-analary qurǵan «Ashyq álem» qorynyń prezıdenti Álııa Arharova.
