Qazaqstanda tuńǵysh ret A.N.Syzǵanov atyndaǵy ulttyq ǵylymı hırýrgııa ortalyǵynda júrek pen baýyrdy aýystyrý operatsııalary jasalmaq
MATY. 8 qarasha. QazAqparat /Názıra Eleýhan/ - Qazaqstanda tuńǵysh ret A.N.Syzǵanov atyndaǵy ulttyq ǵylymı hırýrgııa ortalyǵynda júrek pen baýyrdy aýystyrý operatsııalary jasalatyn bolady.
Bul týraly búgin Almatyda transplantologııa máselelerine arnalǵan baspasóz máslıhatynda Syzǵanov atyndaǵy UHO bas dırektory, professor, RMǴA akademıgi Jetkergen Arzyqulov málim etti.
Onyń aıtýynsha, júrek aýystyrýdyń birinshi operatsııa bıylǵy jyldyń qarasha aıynda jasalynbaq. «Al, baýyrdy aýystyrýdy jeltoqsan aıyna josparlap otyrmyz. Bul kúrdeli másele, onyń naqty qashan jasalýyn biz de aıta almaımyz, ol jaǵdaıǵa baılanysty. Operatsııalardy shetelde oqyp kelgen biliktiligi joǵary mamandar jasaıtyn bolady. Ol úshin jaqynda Qazaqstannyń 50 shaqty dárigeri alys shetelder men TMD memleketterine baryp, transplantatsııa jasaýdy úırenip qaıtty»,-dedi ol.
Transplantatsııa - memleket úshin ekonomıkalyq jaǵynan tıimdi tásilderdiń biri jáne ol emdeýdiń birden-bir áleýmettik radıkaldy joly bolyp tabylady. «Adamnyń ishki aǵzasyn aýystyrý syrqattyń, ólim aýzynda jatqan adamnyń ómirin saqtap qalýǵa kómektesedi. Búgingi zamanaýı medıtsına bir mezgilde júrek, ókpe, baýyr, sonymen qatar, uıqy bezi syndy birneshe aǵzany aýystyrýǵa múmkindik berip otyr. Odan qazirgi medıtsınanyń qanshalyqty damyǵandyǵyn baıqaýǵa bolady»,-dedi J.Arzyqulov.
Ol sonymen qatar: «Qazirgi ýaqytta Qazaqstan Respýblıkasynda shamamen 1200 patsıenttiń júregin aýystyrý, taǵy sonsha adamnyń baýyryn da aýystyrý qajettiligi týyndap otyr. Al, basqa túrli transplantologııa boıynsha operatsııaǵa 4000 -nan 10 000-ǵa deıin patsıent kómekke zárý bolýda»,-dedi.
Onyń pikirinshe, medıtsınanyń bul salasyna qoǵamnyń kózqarasyn ózgertý úshin ýaqyt qajet.
