Qazaqstanda tuńǵysh ret 10 tomdyq «Dala folklorynyń antologııasy» daıyndaldy
«Atalǵan toptama – qazaq folklorynyń barlyq janrynyń tańdaýly úlgilerin jınaqtaǵan, túrli-tústi sýrettermen, etnografııalyq sózdikpen, elektrondy, aýdıo nusqasy qamtylǵan, on myń taralymmen jarııalanyp otyrǵan elimizdegi tuńǵysh tolymdy antologııa», - dedi M.Áýezov atyndaǵy Ádebıet jáne óner ınstıtýtynyń ǵylymı qyzmetkeri Nasıhat Mursalımova.
Antologııa – qazirgi kezde tarıhshylarǵa, psıhologtarǵa, qoǵamtanýshylarǵa, mádenıettanýshylarǵa, ádebıetshilerge, tilshilerge, etnograftarǵa, qazaq ómirin zertteıtin qoǵamdyq-gýmanıtarlyq pánderdiń barlyǵyna, sonymen qatar Qazaqstannyń joǵary oqý oryndary, arnaýly jáne jalpy bilim beretin oqý oryndarynyń oqý quraldary retinde qoldanylady.
«Dala folklorynyń antologııasy» 1-10 tomdarynyń kitabı nusqasy elimizdiń qoljazba qorlary men buryn jarııalanǵan jınaqtardyń, sondaı-a, alys-jaqyn shetelderdegi qazaq dıasporalarynyń materıaldaryn jete saralap, irikteý negizinde daıyndaldy.
Antologııanyń aýdıonusqasyn daıyndaý – óte kúrdeli ári jaýapty jumys boldy. Oǵan dástúrli halyq mýzykasyn, án-jyryn jazyp, jarııalaýǵa mashyqtanǵan kásibı tájirıbesi bar, zamanaýı qondyrǵylarmen jumys isteı alatyn bilikti mamandar jumyldyryldy. Jumys barysynda Qurmanǵazy atyndaǵy Ulttyq konservatorııanyń, T.Júrgenov atyndaǵy Óner akademııasynyń ustaz-oqytýshylary men ónerpazdary, qajettigine qaraı óńirlerdegi dástúrli óner mektepterinen de jyrshy-oryndaýshylar, tanymal akter-dıktorlar tartyldy. Aýdıojazba men tsıfrlandyrý jumystary arnaıy stýdııalarda júzege asyryldy.
Antologııany baspaǵa daıyndaý jumystaryn M.O. Áýezov atyndaǵy Ádebıet jáne óner ınstıtýtynyń ǵalym mamandarynan jasaqtalǵan arnaıy shyǵarmashylyq top júzege asyrdy jáne olardyń jumysyna redaktsııalyq alqa, jobanyń ǵylymı jetekshisi, ǵylymı jáne jaýapty redaktorlar, ǵalym-sarapshylar, sondaı-aq ınstıtýttyń Ǵylymı keńesi basshylyq jasady.
Nátıjesinde «Dala folklory antologııasynyń» 10 tomy «Brand Book» baspahanasynan jaryq kórdi: 1-tom. «Batyrlar jyry»: 2-tom: «Batyrlar jyry»; 3-tom: Tarıhı jyrlar; 4-tom: «Ǵashyqtyq jyrlar»; 5-tom: «Dastandar»; 6-tom. «Ǵuryptyq folklor»; 7-tom. «Prozalyq folklor: Ertegiler»; 8-tom. «Prozalyq folklor: Ańyzdar»; 9-tom. «Halyq óleńderi»; 10-tom. «Ǵıbratty folklor. Shaǵyn janrlar».
Qazirgi kúni antologııanyń úsh tomy orys jáne aǵylshyn tilderine aýdarylyp jatyr.
