Qazaqstanda Tuńǵysh Prezıdent kúni alǵash ret merekelenedi
ASTANA. 10 qazan. QazAqparat - Kúntizbelik merekeler boıynsha bıyl elimizde Qazaqstannyń Tuńǵysh Prezıdenti kúni alǵash ret 1 jeltoqsanda merekelenetin bolady,
dep habarlaıdy Astana qalasynyń astana.kz resmı saıty.
Byltyr el Parlamenti 1991 jylǵy 1 jeltoqsanda ótken Tuńǵysh Prezıdenttiń saılaýyna qatysty osyndaı sheshim qabyldaǵan edi. Atalǵan merekege oraı Astanada birqatar merekelik is-sharalar josparlanýda. Sporttyq saıystar jáne kontserttik baǵdarlamalarmen qatar, áleýmettik jobalar da júzege asyrylmaq. Atap aıtsaq, sporttyq saýyqtyrý keshenderi men 800 oryndyq 3 balabaqsha paıdalanýǵa beriledi.
Elordadaǵy atqarylyp jatqan jumystardyń qatarynda merekege qyzý daıyndyqty Qazaqstannyń Tuńǵysh Prezıdentiniń murajaıy da bastap ketti. Máselen, 28 qarashada «Oı bólisem halqymmen» dep atalatyn úlken kórme ótkizbek. Kórme aıasynda Elbasynyń jeke muraǵat qorynan dástúrli qujattar, foto jáne beıne materıaldar kópshilik nazaryna usynylady jáne munda Prezıdenttiń eńbek joly men táýelsizdik jyldaryndaǵy tarıhı kezeńderden de eń mańyzdy eksponattar qoıylady.
