Qazaqstanda tuńǵysh Komedııa teatry ashyldy
ASTANA. QazAqparat - Astananyń 20 jyldyǵyna oraı birinshi Komedııa teatry óz jumysyn bastady. Ol elimizdegi osyndaı jalǵyz mekeme, dep habarlaıdy QazAqparat tilshisi.
Teatr repertýarynda barsha álemge tanymal komedııalyq spektaklder bolady. Kórermender olardy qazaq tilinde tamashalaıdy. Komedııa teatrynyń kórkemdik jetekshisi belgili ázilkesh Tursynbek Qabatov. Teatr EKSPO kórmesi aýmaǵynda «Energııa hollynda» ornalasady jáne NOMAD CITY HALL dep atalady.
Elordalyq Komedııa teatrynyń tusaýkeseri búgin jańa teatr ǵımaratynda baspasóz maslıhaty barysynda ótti. Oǵan Astana qalasy mádenıet jáne sport basqarmasynyń basshysy Bolat Majaǵulov jáne astanalyq Komedııa teatrynyń dırektory Tursynbek Qabatov qatysty.
«Astanada Komedııa teatrynyń ashylýynyń qalamyzdyń mádenı damýyna oń yqpalyn tıgizeri sózsiz. Onyń qanatynyń astyna búkil Qazaqstannan talantty jastar jınalady. Teatr jas ázilkeshterge ózin-ózi tanytýǵa jáne óz ónerin pash etýge múmkindik beretin biregeı alańǵa aınalmaq», - dedi elordalyq Mádenıet jáne sport basqarmasynyń basshysy Bolat Majaǵulov.
Teatr bazasynda barsha qazaqstandyqtar unatatyn «Ázil álemi», «Nazar aýdar», «KTA» oıyndary baǵdarlamalary men ázilkeshterdiń avtorlyq óner kórsetýlerinen basqa, mektepter, kolledjder JOO-lar arasynda týrnırler ótkiziledi.
«Elimizde daryndy jastar kóp. Ázil-qaljyń óneri qazaqqa jat emes. Buryn ázil-syqaq keshterin ótkizý úshin zaldardy jaldaıtynbyz. Al endi óz ǵımaratymyz bar. Munyń bizdiń shyǵarmashylyǵymyzǵa oń áser etip, jaqyn arada kórermenderimizdi teatr artısteriniń oryndaýyndaǵy álemge tanymal qoıylymdarymyzben jáne premeralarmen qýantamyz dep oılaımyn», - dedi Komedııa teatrynyń dırektory Tursynbek Qabatov.
