Qazaqstanda tuńǵysh kásibı jeńil atletıka klýby ashyldy
ASTANA. QazAqparat - Óskemende «Altay athletics» kásibı jeńil atletıka sport klýby ashyldy. Elimizde tuńǵysh ret ashylyp otyrǵan klýbtyń quramyna Olımpıada chempıony Olga Rypakova da múshe bolyp kirdi, dep habarlaıdy «QazAqparat»HAA tilshisi ShQO Dene shynyqtyrý jáne sport basqarmasynyń baspasóz qyzmetine silteme jasap.
Alǵashqy kásibı klýb Shyǵys Qazaqstan oblysynyń ákimi Danıal Ahmetovtyń tapsyrmasymen jazda qurylǵan. Klýbtyń resmı túrde kópten kútken ashylýy búgin bolyp ótti. Shara barysynda óńir ákimi Olımpıada chempıony Olga Rypakovaǵa «2016 jyldyń Úzdik sportshysy» atty jeńil atletıkadan Azııa Federatsııasynyń kýbogin tabystady.
«Aımaǵymyzdaǵy sporttyń jańa serpin alǵanyna óte qýanyshtymyz. Muny bizdiń beldi sportshymyz Olga Rypakovanyń bastaǵany qýantarlyq jaǵdaı. Barlyq balalardyń sporttyń jaı ǵana qyzyǵýshylyq emes, eliniń laıyqty, kásibı azamaty bolýyna úlken múmkindik ekenin túsinse deımin. Aldaǵy jyldarda «Altaı» brendin kúlli álem tanysa degen oıdamyz», -dedi Danıal Ahmetov.
Óz kezeginde, Olga Rypakova óńirimizdegi atalmysh sport túrine qoldaý tanytqany úshin oblys ákimine alǵysyn bildirdi.
Aıta keteıik, klýb qurylǵannan beri (osy jyldyń 28 maýsymy) «Gaýhar Lıgasynda» Olga Rypakova altyn medal, Karolın Kıpkırýı kúmis júlde jáne Nora Djerýta qola medal ıelenip úlgergen.
Atalmysh klýb eýropalyq sport klýbtarynyń ishindegi aldyńǵy qatarly, 94 jyldyq tarıhy bar «LC Zurich» klýbymen birlese jumys atqaratyn bolady. Qazirdiń ózinde «Altay athletics» pen «LC Zurich» memorandýmǵa qol qoıǵan.
Klýb músheleriniń quramyna Olımpıada chempıony Olga Rypakova, sonymen qatar Varvara Nazarova jáne Artýr Gafner syndy shyǵysqazaqstandyq jas sportshylar endi. Sondaı-aq, QR jeńil atletıkanyń damýyna serpin berý úshin jobanyń alǵashqy bastamasynda kenııalyq sportshylar klýbqa múshe bolyp kirdi. Klýbtyń Bas menedjeri 30 jylǵa jýyq ýaqyt halyqaralyq iri sport uıymdarynda jumys atqarǵan Gvıdo Tononı bolyp tabylady.
