Qazaqstanda túngi klýbtarǵa baqylaýdy kúsheıtý usynyldy
ASTANA. KAZINFORM — Búgin Senattyń jalpy otyrysynda depýtat Bıbigúl Jeksenbaı adamdar kóp jınalatyn jerlerde, ásirese, oıyn-saýyq mekemeleriniń aýmaǵynda qoǵamdyq qaýipsizdiktiń saqtala bermeıtinin aıtyp, saýal joldady.
— Sońǵy aılarda bolǵan qaıǵyly oqıǵalar túngi klýbtar, bar, oıyn-saýyq oryndarynyń qyzmetinde áli de joǵary deńgeıdegi qaýiptiń saqtalyp otyrǵanyn kórsetti. 2025 jyldyń qańtar–tamyz aılarynyń ózinde el boıynsha «102» jedel arnasyna oıyn-saýyq oryndaryndaǵy quqyq buzý derekterine qatysty 45 992 shaǵym túsken… Kóptegen aıyppul men ákimshilik hattamalarǵa qaramastan, zań buzý jalǵasyp jatyr. Áleýmettik jelilerde bul saladaǵy «kóleńkeli ekonomıkanyń» kórinisteri — zańsyz alkogol satý, salyqtan jaltarý, jekelegen oryndarǵa «qamqorshylyq» jasaý faktileri keńinen talqylanyp otyr, — dedi Bıbigúl Jeksenbaı Úkimet basshysynyń atyna joldaǵan depýtattyq saýalynda.
Onyń aıtýynsha, túngi klýbtardaǵy negizgi problemalarǵa lıtsenzııalaýdy baqylaýdyń jetkiliksizdigi, qoǵamdyq tártip pen qaýipsizdikti júıeli túrde buzý, sondaı-aq klýb ıelerine qarsy qoldanystaǵy sanktsııalardyń tıimsizdigi jatady.
Sonymen qatar senator túngi klýbtar men oıyn-saýyq oryndarynyń jumysyn retteýdiń halyqaralyq tájirıbesine nazar aýdardy. Germanııada klýbtardyń qyzmetine lıtsenzııa jyl saıyn jańartylyp otyrady jáne qaýipsizdik talaptary buzylǵan jaǵdaıda ol birden qaıtarylyp alynady. Sıngapýrda klýbtardaǵy beınebaqylaý polıtsııaǵa onlaın-rejımde beriledi, al shý men tártipsizdikke jol bergen oryndar uzaq merzimge jabylady.
— Zańnamalyq normatıvtik tolyqtyrýlar arqyly túngi klýbtar men barlardy lıtsenzııalaý talaptaryn qaıta qaraý, mindetti qaýipsizdik standarttaryn engizý, mekeme ıeleriniń kelýshilerdiń ómiri men densaýlyǵyna jeke jaýapkershiligin bekitý, jumys ýaqyty men alkogol satýdy baqylaýǵa alý kerek. Túngi klýbtar men barlardyń biryńǵaı memlekettik tizilimin qurylyp, tekserýler men anyqtalǵan zań buzý derekteri týraly aqparat ashyq bolýy tıis. Atalǵan nysandardyń qyzmetin ákimdik, ІІM, TJM jáne salyq organdary tarapynan vedomstvoaralyq baqylaýdy kúsheıtip, monıtorıngtiń tsıfrlyq tehnologııalaryn engizý kerek, — dedi depýtat.
Budan buryn habarlanǵandaı, Astanada túngi klýbtarda azot totyǵyn paıdalanýshylar ustaldy.