Qazaqstanda tumaýmen syrqattanýshylyq boıynsha epıdemıologııalyq jaǵdaı turaqty - QR DSM
ASTANA. 24 jeltoqsan. QazAqparat - Qazaqstan Respýblıkasy Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıteti elimizde tumaýmen jáne jiti respıratorlyq vırýstyq ınfektsııamen (JRVI) syrqattanýshylyq boıynsha epıdemıologııalyq jaǵdaı qalypty ekendigin habarlaıdy.
Densaýlyq saqtaý mınıstrliginiń baspasóz qyzmetiniń habarlaýynsha, JRVI jáne tumaýmen syrqattanýshylyq deńgeıi ótken jyldyń osyǵan uqsas kezeńinen 26,9%-ǵa tómen. Baqylaý deńgeıinen artý tirkelgen joq.
Epıdemıologııalyq maýsym bastalǵaly beri JRVI-nyń 200 589 jaǵdaıy tirkeldi, 1 jasqa deıingi balalardyń arasynda JRVI-nyń 23 388 jaǵdaıy, júkti áıelderdiń arasynda 3327 jaǵdaı tirkeldi.
Elimizdegi 9 zerthanada «A» tıpindegi maýsymdyq tumaýdyń rastalǵan jaǵdaılary tirkeldi. Zerthanalyq monıtorıng nátıjeleri boıynsha respıratorlyq vırýstardyń aınalys belsendiligi tómen, negizinen tumaý emes etıologııadaǵy vırýstar basym bolyp otyr.
Respýblıka boıynsha barlyǵy 1 342 685 adam tumaýǵa qarsy egildi, onyń ishinde jergilikti bıýdjet qarajatynan 971 764 adam, jumys berýshilerdiń esebinen - 301 219 adam, aqyly klınıkalarda - 69 702 adam.
Vaktsınadan keıingi asqyný jaǵdaılary anyqtalǵan joq.
JRVI-nyń jáne tumaýdyń aldyn alý boıynsha keshendi jumys jalǵasýda, naýqas balalar men personaldy mektepke deıingi balalar uıymdary men mektepterine jibermeý úshin qadaǵalaý jumystary kúsheıtildi. Statsıonarlarda, medıtsınalyq uıymdarda naýqastarǵa barý shekteldi, dene qyzýy bar naýqastardy jeke qabyldaý júrgiziledi.
Memlekettik sanıtarlyq-epıdemıologııalyq qadaǵalaý komıteti sýyq tııý aýrýlarynyń alǵashqy belgileri paıda bolǵan kezde (dene qyzýynyń kóterilýi, jótel, tamaqtyń aýyrýy) dárigerdi dereý úıge shaqyrýdy jáne ózdiginen em qabyldamaýdy usynady. Qajet bolǵan kezde bet perde kııý, úı-jaılardy jeldetý jáne ylǵaldy jınaý júrgizý kerek. Adamdar kóp jınalatyn qoǵamdyq oryndarǵa múmkindiginshe barmaǵan jón.
