Qazaqstanda tumaýmen kúres bastaldy
ASTANA. QazAqparat - Aǵymdaǵy jylǵy 26 qyrkúıek pen 26 qazan aralyǵynda Qazaqstanda jedel respıratorlyq vırýstyń, tumaý jáne pnevmokokty ınfektsııaǵa qarsy aldyn alý aılyǵy ótedi, dep habarlaıdy primeminister.kz.
Aılyq sheńberinde alǵashqy medıko-sanıtarlyq kómek uıymdarynda ashyq esik kúnderi uıymdastyrylyp, azamattar atalǵan aýrýlardyń profılaktıkasy boıynsha tegin keńes ala alady.
Aılyqty ótkizýdiń basty maqsaty - halyqty, onyń ishinde aýrýǵa shaldyǵý qaýpi joǵary adamdardy, jumys berýshiler men qyzmetkerlerdi qoǵamdyq jáne jeke qorǵaný sharalary týraly, aýrýdyń asqynýyn aldyn alý úshin ýaqytyly medıtsınalyq kómekke júginýdiń qajettiligi týraly qulaqtandyrý.
Tumaý - aýa arqyly jyldam taralatyn, vırýstyq tumaýdan týyndaıtyn jiti ınfektsııalyq aýrý. Aýrýdyń qaýipti kezeńinde joǵarǵy dene qyzýy, bas aýrýy, bulshyqet pen býyndardyń aýrýy baıqalyp, odan keıin muryn bitelip, jótel paıda bolyp, tamaq aýyra bastaıdy. Dárigerge der ýaqytynda qaralmaý, onyń taǵaıyndaǵan emin qabyldamaý, qosymsha sozylmaly aýrýlardyń bolýy ókpeniń qabynýy, bronhıt, bronhopnevmonııa sııaqty aýyr asqynýlarǵa ákelip, ólimge sebepshi bolýy múmkin.
Qorǵanys maskasyn qoldaný, qoldy jıi jýyp turý nemese zararsyzdandyratyn eritindilermen tazalaý, ǵımarattardy jeldetip turý, ony ylǵaldy tazalaý, syrqattanǵan adammen baılanysty shekteý - JRVI, tumaý jáne pnevmokokty ınfektsııany juqtyrýdyń aldyn alýǵa kómektesedi.
Vaktsınalaý - ınfektsııay aldyn alýdyń eń tıimdi tásili. Dúnıejúzilik densaýlyq saqtaý uıymynyń usynysy boıynsha, tumaýǵa qarsy ekpeni júkti áıelderge, 6 aı men 5 jas aralyǵyndaǵy balalarǵa, 65 jastan joǵary eresek adamdarǵa, sozylmaly aýrýlary bar azamattarǵa jáne densaýlyq saqtaý salasynyń qyzmetkerlerine jasaý kerek.
Esterińizge sala keteıik, halyqtyń osal toptarynyń ókilderine - ókpe, júrek-qan tamyrlary aýrýlarynyń sozylmaly túrlerimen, ımmýnıtet tapshylyǵy bar, jıi aýyratyn, jáne densaýlyǵy álsiz balalarǵa, medıtsınalyq qyzmetkerler men júkti áıelderge bıýdjet qarajatynyń esebinen vaktsına jasalady. Sonymen birge, vaktsına jumys berýshilerdiń jáne halyqtyń jeke qarajaty esebinen júrgiziledi.
