Qazaqstanda tumaýǵa shaldyqqandardyń sany 18 paıyzǵa azaıdy - QR Densaýlyq saqtaý mınıstrligi
ASTANA. 15 qańtar. QazAqparat - Bıyl Qazaqstanda tumaýmen aýyratyndardyń sany 18 paıyzǵa azaıyp otyr.
Bul týraly búgingi baspasóz máslıhatynda QR Bas memlekettik sanıtarlyq dárigeri Jandarbek Bekshın málim etti.
Onyń habarlaýynsha, ótken jyldyń qazan aıynan bastap respýblıka boıynsha jedel respıratorlyq vırýstyq ınfektsııalarǵa (JRVI) shaldyqqan 328 myńnan astam adam tirkeldi. Sondaı-aq Soltústik Qazaqstan, Shyǵys Qazaqstan, Batys Qazaqstan oblystarynda, Astana men Almaty qalalarynda maýsymdyq tumaýǵa dýshar bolǵan 9 adam anyqtaldy. «Jalpy, ótken jylmen salystyrǵanda, osy joly jedel respıratorlyq vırýstyq ınfektsııalar men tumaýmen aýyrǵandardyń sany 18 paıyzǵa azaıyp otyr», - deıdi QR Bas memlekettik sanıtarlyq dárigeri J.Bekshın.
QR Densaýlyq saqtaý mınıstrliginiń málimetine sáıkes, osy ýaqytqa deıin respýblıka boıynsha 1,3 mln. adamǵa tumaýǵa qarsy vaktsına egildi. Olardyń ishinde 75 myń júkti áıel bar. Olarǵa vaktsına egilgennen keıin eshqandaı asqynýlar tirkelgen joq.
