Qazaqstanda tumaýǵa qarsy vaktsına nege óndirilmeıdi
ASTANA. QazAqparat - Qazaqstanda tumaýǵa qarsy vaktsınalardy óndirý tıimsiz. Bul týraly Astanada ótken baspasóz máslıhatynda QR DSM Qoǵamdyq densaýlyq saqtaý komıtetiniń tóraǵasy Jandarbek Bekshın málim etti, habarlaıdy QazAqparat.
«Bizde tumaýǵa qarsy vaktsına óndirilmeıdi. Óıtkeni elimizde halyqtyń sany aıtarlyqtaı kóp emes. Eger de ony ózimiz óndirsek, onyń quny tym qymbat bolady. Mysaly, Reseıde halyq sany 150 mıllıonǵa jýyq adam turady. Sondyqtan osynshama turǵynǵa óndirgen kezde, vaktsına baǵasy tómen bolady», - dep túsindirdi Bas sanıtarlyq dáriger.
Budan buryn habarlanǵandaı, Qoǵamdyq densaýlyq saqtaý komıtetiniń aqparaty boıynsha, Qazaqstanda qazan aıynan bastap turǵyndardyń 10 paıyzy vaktsınatsııalanady. 2018 jyly bıýdjet qarajatyna Reseıde óndirilgen «GRIPPOL +» vaktsınasynyń 1,5 mln. dozasy 1 mlr. 200 mln.teńgege satyp alyndy. Vaktsına A (H3N2) jáne A (H1N1) jáne V tumaý shtammdarynyń antıgenderin qamtıdy. Odan basqa Qazaqstanda 3 óndirýshiniń tumaýǵa qarsy taǵy 4 vaktsınasy tirkelgen.
Taratylǵan málimetterge qaraǵanda, aldyn alý maqsatynda árbir adam qalaýy boıynsha tumaýǵa qarsy aqyly túrde vaktsına alady.
Bas sanıtarlyq dárigerdiń atap ótýinshe, bıyl vaktsınany jappaı egý sharalary elimizde 1 qazannan bastalady.
