Qazaqstanda tumaý, polıomıelıt, týberkýlez ben brýtsellezge qarsy vaktsınalar shyǵaratyn zaýyt salynady
ASTANA. 12 aqpan. QazAqparat - Qazaqstanda tumaý, polıomıelıt, týberkýlez jáne brýtsellezge qarsy vaktsınalar shyǵaratyn zaýyt qurylysy bastalady.
Bul týraly búgin QR Bilim jáne ǵylym mınıstliginde ótken baspasóz máslıhatynda «Ǵylym qory» AQ Basqarma tóraǵasy Qýatjan Ýálıev málim etti.
«Keleshekte «Ǵylym qory» Almaty oblysy Gvardeıskıı qalashyǵynda jylyna 10 mıllıonǵa deıin dári-dármek shyǵara alatyn, GMP standartyna saı Bıofarmatsevtıkalyq zaýyttyń qurylysyn bastaıdy. Bul zaýytta tumaýǵa, polıomıelıtke, týberkýlezge jáne brýtsellezge qarsy medıtsınalyq vaktsınalar shyǵarylatyn bolady. Atalmysh jobany halyqaralyq, otandyq jáne Dúnıejúzilik densaýlyq saqtaý uıymynyń sarapshylarymen ortaqtasa otyryp, jiti talqyladyq. Jobanyń tehnıkalyq-ekonomıkalyq negizdemesi jasaldy, jaqyn arada smetalyq jobalaý qujattaryn ázirleý josparlanyp otyr», - dedi Q.Ýálıev.
Onyń aıtýynsha, Qazaqstanda tumaýǵa jáne týberkýlezge qarsy vaktsınalar jasaıtyn birde bir kásiporyn joq. Sondyqtan atalmysh jobanyń bul salada teńdesi joq dep ataýǵa bolady. Medıtsınalyq preparattar zaýyty Gvardeıskıı qalashyǵyndaǵy Bıologııalyq qaýipsizdik ınstıtýtynyń aýmaǵynda ornalaspaq.
Jalpy «Ǵylym qory» 2007-2012 jyldar aralyǵynda 22 granttyq jobany qarjylandyrdy. Nátıjesinde 15 joba patentke ıe boldy, 3-eýi avtorlyq kálik alyp, 6 joba avtorlyq quqyqqa ótinim berdi.
