Qazaqstanda tumaý men tynys joldary aýrýlary boıynsha aldaǵy epıdemııalyq maýsymǵa daıyndyq bastaldy
ASTANA. 13 qyrkúıek. QazAqparat - Qazaqstanda tumaý men tynys joldary aýrýlary boıynsha aldaǵy epıdemııalyq maýsymǵa daıyndyq bastaldy. Bul týraly QR Densaýlyq saqtaý mınıstrliginiń baspasóz qyzmeti habarlaıdy.
Vedomstvonyń jibergen aqparaty boıynsha, respýblıkada jergilikti bıýdjet qarajatynan 549,8 mln. teńge somaǵa maýsymdyq tumaýǵa qarsy vaktsınalardyń 800 myń dozasy satyp alyndy.
Bıylǵy 1 qazannan bastap maýsymdyq tumaýǵa qarsy ımmýndaýdyń jappaı naýqany bastalady, ol bıyl birinshi kezekte uıymdasqan ujymdardyń balalary men júkti áıelderdi vaktsınatsııalaýǵa baǵyttalyp otyr jáne vaktsınatsııalaý aǵymdaǵy jylǵy 1 jeltoqsanda aıaqtalady.
Byltyrǵy epıdemııalyq maýsymda epıdemıologııalyq jaǵdaı belgilengen deńgeıden aspaı, turaqty boldy. Tynys joldary aýrýlarynyń 859 211 jáne tumaýdyń 549 jaǵdaıy tirkeldi. Monıtorıngke sáıkes byltyrǵy epıdemııalyq maýsymda tumaýǵa qarsy vaktsınalardy satyp alý úshin respýblıka boıynsha jergilikti bıýdjet qarajatynan 495 mln. teńgeden astam aqsha bólinip, 709 184 adam egildi, jalpy egilgen adamdardyń ishinde jumys berýshilerdiń qarajaty esebinen 211 164 adam (19,5%), aqyly negizde 160 655 adam (14,9%) egildi. Barlyǵy 1 081 003 adam egilgen. Vaktsınatsııalaýdan keıingi asqynýlar bolǵan joq.
Mamandardyń aıtýynsha, aǵymdaǵy epıdemııalyq maýsymda tumaýdyń A jáne V vırýstary aınalymda bolady dep boljanady. Tumaýǵa qarsy vaktsınalardyń quramy tumaýdyń A jáne V vırýstarynyń shtamdaryn qamtıtynyn aıta ketý kerek.
Bıylǵy 1 qyrkúıekten bastap óńirlerde Qazaqstan Respýblıkasy Densaýlyq saqtaý mınıstrliginiń mamandary tumaýdyń jáne tynys joldary aýrýlarynyń aldyn alý máseleleri boıynsha densaýlyq saqtaý organdary men uıymdaryna praktıkalyq kómek kórsetýde.
«Halyqqa sýyq tııýdiń alǵashqy belgileri (dene qyzýynyń kóterilýi, jótel, tamaqtyń isinýi) paıda bolǵan kezde medıtsınalyq kómekke ýaqtyly júginýdi jáne ózdiginen em qabyldamaýdy, qajet bolǵan kezde dáke betperdelerin kııýdi, úı-jaıdy jeldetýdi jáne ylǵaldy jınaý júrgizýdi usynamyz. Múmkindiginshe, adamdar kóp jınalatyn qoǵamdyq oryndarǵa barmaý kerek. Balalary aýyrǵanda ata-analar dárigerdi úıge shaqyrýy kerek. Dári-dármekpen qatar, halyqtyq medıtsına boıynsha - sarymsaq, qaınatylǵan shóp, jaqpamaı paıdalaný aldyn alýdyń tıimdi joly bolyp tabylady», - deıdi dárigerler.
