Qazaqstanda tuman, kóktaıǵaq, burqasyn bolady - 6 aqpanǵa arnalǵan aýa raıy boljamy
ASTANA. 6 aqpan. QazAqparat - Búgin Qazaqstan aýmaǵynyń kóptegen bóligi atmosferalyq frontaldyq bólikterdiń yqpalynda bolyp, onymen birge aýa raıynyń turaqsyz sıpaty saqtalady, jaýyn-shashyndar ótip, keıbir jerlerde tuman, kóktaıǵaq, burqasyn, jeldiń kúsheıýi baıqalady.
Tek ońtústik pen ońtústik-batysta jaýyn-shashynsyz kún raıy kútiledi, dep habarlady TJM-niń baspasóz qyzmetinen Qazgıdrometke silteme jasap.
Atap aıtqanda, Aqtóbe, Qostanaı, Soltústik Qazaqstan oblystarynyń keıbir jerlerinde burqasyn, tuman, kóktaıǵaq bolady, jeldiń ekpini 15-20 m/s-qa deıin kúsheıýi yqtımal.
Aqmola, Qyzylorda oblystarynda, túnde Pavlodar, Ońtústik Qazaqstan oblystarynyń keıbir jerlerinde tuman bolady.
Almaty, Mańǵystaý oblystarynyń keıbir jerlerinde tuman, kóktaıǵaq kútiledi.
Jambyl oblysynyń keıbir jerlerinde jeldiń jyldamdyǵy 15-20 m/s-qa deıin kúsheıedi, túnde keıbir jerlerde tuman, kóktaıǵaq bolady.
Atyraý oblysynyń keı aýmaqtarynda tuman, kóktaıǵaq bolýy yqtımal, túnde jeldiń jyldamdyǵy 15-20 m/s-qa deıin jetedi.
Qaraǵandy oblysynyń keıbir jerlerinde azdaǵan burqasyn, tuman bolýy múmkin.
Shyǵys Qazaqstan oblysynyń keıbir jerlerinde burqasyndatady.
Jaqyn táýlikte Ońtústik Qazaqstan oblysyndaǵy alasa taýly ózenderde sý deńgeıiniń azaıýy baıqalady. Arys ózeninde (Sháýildir) ótken tasqyndy sý tolqyndarynyń jetýi esebinen sý ótimdigi artady. Respýblıkanyń ońtústik-shyǵys jáne shyǵysyndaǵy jekelegen ózenderde sý deńgeıiniń aýytqýy kútiledi. Qazaqstannyń qalǵan sýly nysandarynda gıdrologııalyq rejımde aıtarlyqtaı ózgerister kútilmeıdi.
