Qazaqstanda túlekterdi keshendi testileý aıaqtaldy, tómengi mejeni tapsyrýshylardyń 35 paıyzy ǵana eńsere aldy
ASTANA. 24 shilde. QazAqparat - Keshendi testileý 19-22 shilde aralyǵynda 37 bazalyq joǵary oqý ornynda ótti, dep habarlady QR Bilim jáne ǵylym mınıstrliginiń baspasóz qyzmetinen.
Vedomstvonyń atap ótýinshe, oǵan 65 000 adam qatysty. Olar: ótken jylǵy mektep bitirýshiler (9 myńǵa jýyǵy), sondaı-aq, tehnıkalyq jáne kásiptik bilim berý uıymdaryn bitirip, oqýyn joǵarǵy oqý oryndarynda jalǵastyrýǵa nıet bildirgender (56 myńǵa jýyq).
Ótken jylmen salystyrǵanda, keshendi testileýge qatysýshylar sany 2,5 esege ulǵaıǵan (2011 jyly 27 193 túlek).
Bıylǵy jyly mınıstrlik TjKB uıymdary túlekterine arnaıy 2700 grant bóldi. Keshendi testileý nátıjeleri boıynsha shektik baldy (50 ball) 21 500 túlek jınady, bul barlyq qatysýshylardyń 35 paıyzy bolyp tabylady. Orta ball 42,6 paıyzdy qurady «43,4 paıyzy - qazaq bólimine, 41,3 paıyzy - orys bólimine tapsyrǵandar», - delingen baspasóz habarlamasynda.
Sonymen qatar aǵymdaǵy jyly 8 túlek 100 ball jınady. Al 5 myńnan astam adam ulttyq ýnıversıtetter úshin belgilengen mejeni - 70-ten joǵary ball jınady.
