Qazaqstanda túlekter keshine qansha qarjy jumsalady

ASTANA. KAZINFORM – Qazaqstanda mektep túlekteri keshke daıyndalyp jatyr. Keshe ǵana mektepte sabaq oqyp júrgen bozbala men boıjetken búgin sándi kıim izdep júrse, ata-analar saltanatty shara ótkizbek. Kazinform agenttigi elimizdiń ár óńirindegi baǵany salystyrdy. 

Mektep bitirý keshine keter shyǵyndy esepteý úshin eki adamǵa (bala men ata-ananyń biri) qajetti qarjy esepteldi.

Meıramhana

Eń negizgi shyǵyn – merekelik dastarqan. Meıramhanalarda eki adamǵa 40 000 – 150 000 teńge qajet. Bul qarjyǵa tiskebasar, salat, ystyq tamaq pen shaı dastarhany, sonymen birge asaba, vıdeograf qyzmeti kiredi. Lımýzın men LED-ekrandy jalǵa alady. Elimiz boıynsha eń tómen baǵa Petropavl, Túrkistan men Tarazda. Bul qalalarda banket quny eki adamǵa 40 000 – 45 000 teńge.

Aqtóbe, Oral, Pavlodar, Kókshetaý, Qonaev, Pavlodar, Kókshetaý, Qonaev, Taldyqorǵan men Jezqazǵanda baǵa odan sál joǵary. Eki adamǵa 50 000 – 60 000 teńge. 

Al Astana, Almaty, Aqtaý, Qaraǵandy, Qostanaı, Shymkent pen Qyzylordada meıramhanalardyń baǵasy eki adamǵa 70 000 teńgeden bastalyp, 100 000 teńgege deıin jetedi.

Óskemen men Semeıde meıramhana baǵasy qymbat. Eki adamǵa – 118 000 teńge. 

Eń qymbaty – Atyraý qalasynda. Munda eki adamǵa 150 000 teńge kerek.

Taǵy bir qajetti dúnıe – estelik foto. 

Fotostýdııalar fotoalbomnyń birneshe túrin usynady. Keıbir túlekter qarapaıym ǵana estelik fotony jón kóredi. Olar 4-5 betten turatyn fottalbomdy tańdaıdy. Keıbiri fotosessııa uıymdastyryp, 100 bettik albomǵa tapsyrys beredi. Estelik albomnyń ortasha baǵasy – 10 000 teńge.

Eń arzan fotoalbom Petropavl, Semeı, Óskemende jasalady. Bul qalalarda baǵa – 8000 – 8500 teńge.

Kollaj: Kazinform

Aqtóbe, Qaraǵandy, Jezqazǵan, Qyzylorda, Qonaev pen Tarazda baǵa sál joǵary. Munda estelik albom 9000 – 12 000 teńge aralyǵynda.

Astana, Almaty, Oral, Pavlodar, Túrkistan men Taldyqorǵanda fotoalbom baǵasy – 15 000 – 17 000 teńge.

Atyraý, Qostanaı men Shymkentte baǵa – 20 000 teńge.

Túlekterdiń fotoalbomy Aqtaýda qymbat. Munda baǵa – 30 000 teńge.

Sándi kıim

Bitirýshi túlekterdiń kıim úlgisi de, onyń baǵasy da ártúrli. Er balalarǵa qaraǵanda qyzdardyń ata-analary kóp shyǵyndalady.

Elimizde saltanatty keshke arnalǵan kóılektiń ortasha quny táýligine 10 000 – 150 000 teńge. Al eger satyp alsa, baǵa birneshe ese qymbat bolady. Er balalarǵa arnalǵan kostıým-shalbar orta eseppen 50 000 teńge bolyp tur.

Sonymen birge tizimge qyzdardyń shash úlgisi men bet árleýdi qosýǵa bolady. Ortasha baǵasy – 20 000 teńge jáne odan joǵary.