Qazaqstanda tuqym óndiretin eki ǵylymı ortalyq salynady

ASTANA. QazAqparat - Qazaqstanda júgeri, soıa jáne arpanyń sapaly tuqymdary tapshy. Bul týraly KazSeed kásipornynyń bas dırektory Almas Tátishev málim etti, dep habarlaıdy QazAqparat tilshisi.

Almas Tátishevtiń aıtýynsha, osy máseleni sheshý úshin 2019 jyly eki ǵylymı ortalyqtyń qurylysy bastalady. Olar 2020 jyly paıdalanýǵa beriledi.

«Qazaqstannyń ońtústigi men soltústiginde tuqym óndirýge arnalǵan eki ǵylymı ortalyq ashý josparlanǵan. Ǵylymı ortalyqtarda elimizdiń ár óńirine beıimdelgen tuqymdar shyǵarylady. Óıtkeni ár jerdiń topyraǵy men mıkroflorasy, býnaqdenelileri de, sýy da ártúrli bolady», - dedi ol.

Kásiporyn basshysynyń sózinshe, óndirilgen tuqymnyń 10% ǵylymı ortalyqtardyń óz qajettiligine qaldyrylyp, 90% Qazaqstanda, sondaı-aq Eýropa, Azııa elderinde satylady.

Budan tys, ol amerıkalyqtarmen birlese salynatyn quramynda GMO joq júgeri jáne soıa tuqymdaryn óndiretin zaýyttyń qurylysy týraly aıtty.

«Biz tuqym óndirý salasyna amerıkalyqtardyń tájirıbesin engizip jatyrmyz. Birikken kásiporyn salyp, tehnologııa jáne tájirıbe almasamyz. Zaýyt jylyna 25 myń tonna tuqym beretin óndiris qýatyna ıe bolady. Bul, Qazaqstan fermerlerine 1 mln gektarǵa tuqym sebý múmkindigin beredi», - Almas Tátishev.

Onyń aıtýynsha, tuqymǵa GMO qospaý múmkindigi qarapaıym selektsııa ádisiniń arqasynda múmkin bolǵan.

Avtory: Kamıla Ámirova