Qazaqstanda tuqym tapshylyǵy qalaı joıylady – AShM jaýap berdi

ASTANA. KAZINFORM – Elimizde keıbir maıly daqyldardyń tuqymy tapshy. QR AShM bul másele aldaǵy jyldary qalaı sheshimin tabatynyn málimdedi.

Vedomstvonyń habarlaýynsha, bıyl eginshilik maýsymyna qajetti tuqym qory tolyq.

— Oblys ákimdikteriniń jedel derekteri boıynsha, 2025 jyly aýyl sharýashylyǵy taýaryn óndirýshilerge 2,3 mln tonna dándi jáne maıly daqyldar tuqymy qajet, olar búgingi kúni tolyǵymen jabylǵan, - delingen AShM resmı jaýabynda.

Sondaı-aq aýyl sharýashylyǵy kásipkerleri jyl saıyn sorttyq ártúrlilik úshin otandyq tuqymdarmen qatar ımporttyq tuqymdardy da satyp alatyny aıtyldy.

— Bıdaı tuqymdary negizinen Reseıden, maıly daqyldar Frantsııadan, Túrkııadan, AQSh-tan, kartop tuqymdary Reseıden, Belarýsten, Germanııadan satyp alynady, - dep jazylǵan habarlamada.

Odan bólek vedomstvo tuqym tapshylyǵy máselesi qalaı sheshimin tabatynyn da atap ótken:

— Respýblıka boıynsha tuqymmen qamtamasyz etý 89%, bul rette maıly daqyldardyń jekelegen túrleri (kúnbaǵys 67%, raps 40%, maqsary 12,9%), kókónis daqyldary jáne qant qyzylshasymen qamtamasyz etýdiń paıyzy tómen. Importqa táýeldilikti qysqartý jáne agrarlyq sektordy otandyq selektsııanyń básekege qabiletti tuqymdarymen qamtamasyz etý jónindegi másele QR Aýyl sharýashylyǵy daqyldarynyń selektsııasy men tuqym sharýashylyǵyn damytýdyń 2024–2028 jyldarǵa arnalǵan Keshendi josparyn iske asyrý esebinen sheshiletin bolady. Onyń nátıjesinde Aýyl sharýashylyǵy daqyldarynyń 108 jańa sorty men býdany qurylyp, 2028 jylǵa qaraı otandyq selektsııa tuqymymen sebilgen eldiń egis alqaptarynyń úlesi 78,2%-ǵa deıin arttyrylady (2024 jyly 52,3%).

Keshendi josparǵa saı, zańnamalyq jáne normatıvtik bazany jetildirý, selektsıonerler men tuqym óndirýshilerdiń materıaldyq-tehnıkalyq bazasyn jańartý, qazaqstandyq selektsıonerlerdiń sheteldik jáne álemdik ǵylymı ortalyqtarmen birlesken jumysyn jandandyrý qolǵa alynady.

Odan bólek, salaǵa jas kadrlardyń kelýi úshin qolaıly jaǵdaı jasaý arqyly selektsııa jáne tuqym sharýashylyǵy júıesin jańǵyrtýǵa baǵyttalǵan birqatar is-shara kózdelgen.

Aıta keteıik, Qazaqstanda ónimdilikti arttyrý úshin joǵary sapaly tuqymdar ortalyǵy qurylady.