Qazaqstanda týǵan 33 jastaǵy azamat Londondaǵy bedeldi aýdannyń depýtaty atandy
ASTANA. KAZINFORM – Qazaqstanda týǵan 33 jastaǵy Sanjar Ábishev Londonnyń ortalyǵyndaǵy bedeldi Sent-Djeıms aýdanynan Vestmınster keńesiniń depýtaty bolyp saılandy. Bul týraly qazaqstandyq kásipker Qanat Kópbaev áleýmettik jelide habarlady.
S.Ábishevtiń ózi Ulybrıtanııada mektep jasynan beri turady. Ol Malvern College kolledjin jáne ýnıversıtetti támamdaǵan. Keıin brıtandyq kompanııalarda marketolog bolyp jumys istep, 2016 jyldan beri óziniń marketıng agenttigin damytyp keledi. Sonymen qatar 2015 jyldan bastap áleýmettik jobalardy qoldaıtyn qaıyrymdylyq uıymyn basqarady.
Saıasatqa Ábishev 2022 jyldan beri aralasa bastaǵan. Al 2024 jyly Konservatıvtik partııanyń Sent-Djeıms okrýgindegi jergilikti bólimshesin basqardy. Saılaýda ol leıborıster partııasynyń kandıdatyn 350-den astam daýyspen basyp ozǵan. Jergilikti deńgeı úshin bul aıtarlyqtaı úlken aıyrmashylyq sanalady.
Qanat Kópbaevtyń aıtýynsha, Ábishevtiń brıtan elıtasynda týystary nemese baılanystary bolmaǵan.
– Qarapaıym qazaq otbasynan shyqqan jigit bilimniń, tártiptiń jáne kóp jylǵy eńbektiń arqasynda mártebeli aýdannyń meri deńgeıine jetti, – dep jazdy ol.
Sent-Djeıms – Londonnyń qaq ortasyndaǵy Vestmınster aýdanyna kiretin 18 okrýgtiń biri. Ol Býkıngem saraıy mańynda, Piccadilly men Regent Street kósheleriniń arasynda ornalasqan. Munda koroldik saıabaqtar, qymbat qonaqúıler, iri kompanııalardyń shtab-páterleri jáne shetel elshilikteri shoǵyrlanǵan.
Ár okrýgten úsh keńesshi saılanady. Olar abattandyrý, avtoturaq, jergilikti qaýipsizdik jáne polıtsııamen ózara is-qımyl máselelerimen aınalysady. Ábishev osyndaı mandattardyń birin ıelenip, 2029 jylǵa deıin qyzmet atqarady.
Keńesshiler tolyqqandy jalaqy almaıdy. Olarǵa jylyna shamamen 10 800 fýnt kóleminde bazalyq járdemaqy ǵana tólenedi. Sondyqtan Sanjar Ábishev saıasatpen qatar bıznesin de jalǵastyryp keledi.
Onyń saılaýaldy ýádeleriniń arasynda úısizdikpen kúres máselesi bar. Depýtattyń dereginshe, Londonda 13 myńnan astam adam kóshede túnep júr. Sondaı-aq ol qoljetimdi turǵyn úı qurylysy josparyn oryndaýdy talap etken.
Saılaý naýqany kezinde Ábishev 79 jastaǵy er adamnyń ómirin qutqaryp qalǵany da aıtyldy. Qart adam qulap jaraqat alǵannan keıin birneshe kún boıy páterinde jatqan. Ábishev jedel járdem shaqyryp, dárigerler kelgenshe onyń janynda bolǵan.
– Eger jalǵyz turatyn kórshińiz bolsa, onyń esigin qaǵyp, jaǵdaıyn suraýǵa 10 mınýt ýaqytyńyzdy bólińiz. Bul bireýdiń ómirin saqtap qalýy múmkin, – dep jazdy ol keıin áleýmettik jelide.
Eske sala keteıik, buǵan deıin álemde alǵash ret Joǵarǵy Sotty basqarǵan qazaq qyzy týraly jazdyq.
