Qazaqstanda týberkýlezge shaldyqqandar sany azaıdy
ASTANA. KAZINFORM — Elimizde týberkýlezben syrqattanýshylyq 11%-ǵa tómendedi, dep habarlaıdy DSM baspasóz qyzmeti.
Qazaqstanda 2026 jyldyń birinshi jartyjyldyǵynyń qorytyndysy boıynsha týberkýlezben syrqattanýshylyq 11%-ǵa — 3 265 jaǵdaıdan 2 919 jaǵdaıǵa deıin tómendedi. Syrqattanýshylyq kórsetkishi 100 myń turǵynǵa shaqqanda 14,23 shamasynda boldy.
Epıdemıologııalyq jaǵdaı jáne medıtsınalyq uıymdardyń monıtorıngi nátıjeleri QR Densaýlyq saqtaý mınıstrliginiń alqa otyrysynda qaraldy. Týberkýlezdiń aldyn alý boıynsha jumystyń negizgi qorytyndylaryn QR Bas memlekettik sanıtarııalyq dárigeri Sarhat Beısenova tanystyrdy.
— Jasóspirimderdiń arasynda syrqattanýshylyq 20,4%-ǵa tómendedi. 14 jasqa deıingi balalardyń arasynda da oń dınamıka baıqalady. Sonymen qatar balalardaǵy jaǵdaılardyń úshten birine jýyǵy medıtsınalyq kómekke óz betinshe júgingennen keıin anyqtalady. Bul aýrýdy erte dıagnostıkalaýdy kúsheıtýdi talap etedi. Týberkýlezge qaıta shaldyǵý jaǵdaılarynyń sany 12,1%-ǵa qysqardy. Joǵary qaýip tobyndaǵy halyqtyń 95,9%-y flıýorografııalyq tekserýden ótti. Nárestelerdi 88,5% BTsJ vaktsınasy salyndy, — dedi ol.
Óńirlerde ata-analardyń arasynda vaktsınatsııalaý máseleleri boıynsha aqparattyq-túsindirý jumystary jalǵasady.
Sáýirden maýsymǵa deıin memlekettik baqylaý men qadaǵalaýdyń jańa formaty sheńberinde densaýlyq saqtaý nysandaryna aýqymdy monıtorıng júrgizildi. Qamtý deńgeıi 99,6%-dy qurady.
Negizgi nazar ınfektsııalyq baqylaý talaptarynyń saqtalýyna, profılaktıkalyq tekserýlerdi uıymdastyrýǵa jáne balalardyń arasynda týberkýlezdi erte anyqtaýǵa aýdaryldy.
Monıtorıng nátıjeleri boıynsha 7 144 nusqama berildi, olardyń 60%-dan astamy oryndaldy. Anyqtalǵan buzýshylyqtar boıynsha zańnamada kózdelgen tıisti den qoıý sharalary da qabyldandy.
Alqa otyrysynyń qorytyndysy boıynsha óńirlerge, eń aldymen epıdemıologııalyq qaýpi joǵary aýmaqtarda aýrýdy erte dıagnostıkalaýdy kúsheıtý, dıspanserlik baqylaý sapasyn arttyrý jáne týberkýlezben baılanysta bolǵan adamdardy tekserýdi tolyq baqylaýdy qamtamasyz etý mindetteri qoıyldy.
Budan buryn Petropavlda jasóspirimnen týberkýlezdiń ashyq túri anyqtalǵanyn jazdyq.
