Qazaqstanda týberkýlezge qarsy kúreske 48 mlrd teńgege jýyq qarjy bólindi
PETROPAVL. QazAqparat - Bıyl elimizde týberkýlezge qarsy kúreske 48 mlrd teńgege jýyq qarajat bólindi. Soltústik Qazaqstan oblysynda osy maqsatqa «Áleýmettik medıtsınalyq saqtandyrý qorynyń» fılıaly shamamen 1,7 mlrd teńge bóldi, bul - 2018 jyldyń kórsetkishinen kóbirek, dep habarlaıdy QazAqparat tilshisi.
Qazaqstanda bul áleýmettik mańyzy bar aýrý patsıentterge tegin medıtsınalyq kómektiń kepildi kólemimen qamtamasyz etý tizimine engizilgen. Sondyqtan týberkýlezdi anyqtaý, aldyn alý jáne emdeý halyq úshin tegin.
Resmı statıstıkaǵa súıensek, 2018 jyly Qazaqstanda 35 myńnan artyq syrqat dıspanserlik esepte turǵan (onyń 15 myńǵa jýyǵy týberkýlezdiń belsendi túrimen aýyratyndar). Onyń ishinde 9 myńǵa jýyq adam patsıentter qataryna jańadan qosylǵan. Syrqattardyń basym bóligi Túrkistan oblysy men Shymkent qalasynda (3604), Almaty oblysynda (3311), Shyǵys Qazaqstan (2860) jáne Qyzylorda (2495) oblystarynda turady.
Oblystyq týberkýlezge qarsy dıspanserdiń málimetteri boıynsha, Soltústik Qazaqstanda týberkýlezdiń epıdemıologııalyq jaǵdaıy turaqty. 2018 jyldyń qorytyndysy boıynsha belsendi týberkýlezben aýyratyn 610 naýqas, ókpe týberkýlezimen aýyratyn 584 adam tirkelgen. Batsılla bóletin patsıentterdiń sany - 369, bul - 63,2% quraıdy. Olardyń barlyǵy aýrýhanada emdeledi. Jyl basynan óńirde týberkýlezdiń 55 jańa jaǵdaıy anyqtalǵan. Biraq, jalpy alǵanda, aýrý kórsetkishiniń tómendeýi baıqalady.
Mamandardyń aıtýynsha, der kezinde anyqtalyp, tıisti em-dom jasalsa týberkýlezdi tolyq emdep jazýǵa bolady. Sondyqtan aýrýdy asqyndyrmaı, emdeýshi dárigerdiń nusqaýlaryn oryndaýdyń mańyzy zor.
«Áleýmettik medıtsınalyq saqtandyrý qorynyń» SQO fılıalynyń halyqty aqparattandyrý bóliminiń málimetinshe, Qazaqstanda bul aýrý ıntegratsııalanǵan baqylaý strategııasy boıynsha emdeledi. Baqylaýdyń bul túri týberkýlezdiń jabyq túrimen aýyratyn naýqastardyń emhanada ambýlatorlyq em qabyldaýyna múmkindik beredi.
Týberkýlezge qarsy profılaktıkanyń negizi - jyl saıynǵy rentgendik skrınıngter, emhanada júıeli tekserýler. Munyń bári árbir qazaqstandyq úshin tegin, sebebi ol medıtsınalyq kómektiń kepildik berilgen kólemine kiredi. Sonymen qatar, jańa týǵan nárestelerge BTsJ vaktsınasy alady.
Jyl saıyn 24 naýryzda álemde Dúnıejúzilik týberkýlezge qarsy kúres kúni atap ótiledi. Dúnıejúzilik densaýlyq saqtaý uıymynyń muryndyq bolýymen ótetin dástúrli shara bıyl «Týberkýlezdi joıý, syrqattardy tolyq emdep jazý» degen uranmen ótpek.
