Qazaqstanda týberkýlezden naýqastardyń 87% saýyǵyp ketti - dárigerler
ALMATY. QazAqparat - Qazaqstanda týberkýlez aýrýyna shaldyqqandardyń 87 paıyzy tolyǵymen aıyǵyp ketken. Bul týraly búgin Óńirlik kommýnıkatsııalar qyzmetinde QR DSM Ulttyq ftızıopýlmonologııa ǵylymı ortalyǵynyń dırektory Málik Ádenov aıtty, dep habarlaıdy QazAqparat.
Mamannyń aıtýynsha, elimizde ókpeniń qurt aýrýy boıynsha epıdemıologııalyq jaǵdaı turaqty.
«Sońǵy 10 jylda týberkýlezge shaldyǵý jaǵdaıy 2,4 esege tómendep, 2017 jyly 100 myń halyqqa shaqqanda 52,2 adamdy qurady. 10 jyl buryn bul kórsetkish 126 bolatyn. Ólim-jitim jaǵdaıy 100 myń halyqqa shaqqanda 6 esege tómendedi», - dedi Málik Ádenov.
Onyń aıtýynsha, búginde Qazaqstanda aýrýdy aýyzdyqtaý boıynsha memlekettik sharalar tıimdiligin kórsetip keledi.
«Skrınıngtik tekserýlerdiń arqasynda, týberkýlezge shaldyǵý jaǵdaıynyń 70%-dan astamy aýrýdyń erte kezeńinen anyqtalýda. Elimizde týberkýlezdi dıagnostıkalaý men emdeýdiń barlyq ınnovatsııalyq ádisteri engizilgen. Emdeý jospary DDU standarttaryna saı keledi. Búginde Qazaqstanda týberkýlezge shaldyqqan naýqastardyń 87 paıyzy aıyǵyp ketken. Qazaqstanda týberkýlez boıynsha ıntegratsııalanǵan baqylaý strategııasy júzege asyrylýda. ıAǵnı, týberkýlez mıkobakterııalaryn shyǵarmaıtyn jáne aınalasyndaǵy adamdarǵa qaýip týdyrmaıtyn patsıentter turǵylyqty mekenjaıy boıynsha emhanalarda ambýlatorııalyq em qabyldaıdy. 2017 jyldyń 12 aıynyń qorytyndysy boıynsha ambýlatorııalyq jaǵdaıda em qabyldaýdy bastaǵan naýqastardyń úles salmaǵy 25,1%-ǵa ósip, 40,3% boldy», - dedi M.Ádenov.
