Qazaqstanda týberkýlezden emdeý aqyly bola ma
ASTANA. QazAqparat - Medıtsınalyq saqtandyrýdyń bolmaǵandyǵyna qaramastan týberkýlezden emdeý tegin bolyp qala beredi. Bul týraly Ulttyq ftızıopýlmonologııa ǵylymı ortalyǵynyń dırektory Málik Ádenov aıtty, dep habarlaıdy QazAqparat tilshisi.
«Memleket barlyq azamattarǵa týberkýlezden emdeý, dıagnostıkalaý jáne onyń aldyn alýda kepildik beredi. Bul rette memleket barlyq shyǵyndardy jabady. Osylaı boldy, áli de solaı jáne bola da bermek. Bizdiń zańnamamyz tipti Qazaqstannyń azamaty bolyp sanalmaıtyn mıgranttarǵa da tegin emdelýge múmkindik beredi. Sebebi el basshylyǵy mıgrantty emdep, aýrýdyń taralýyna jyldam tosqaýyl qoıý jeńil ekendigin túsinedi», - dedi ol Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy aıasynda BAQ ókilderine bergen suhbatynda.
Dırektordyń aıtýynsha, mindetti áleýmettik medıtsınalyq saqtandyrý engizilgennen keıin de týberkýlezden emdeý tegin bolyp qala beredi.
«Táýekel tobyna halyqtyń áleýmettik jaǵynan az qamtylǵan sanaty kiredi. Áleýmettik jaǵdaılaryna baılanysty olardyń densaýlyq ımmýnıteti tómen bolady. Máselen, AITV (VICh) juqtyrǵandardy alar bolsaq, olardyń ımmýnıtetteri tómen jáne soǵan baılanysty týberkýlez ǵana emes ózge de aýrýlardy juqtyrý táýekeli joǵary. Turǵylyqty mekenjaılary joq maskúnemder arasynda da týberkýlez jıi kezdesedi. Týberkýlez aýa arqyly juǵady», - dedi Málik Ádenov.
Buǵan deıin ol sońǵy 10 jylda Qazaqstanda týberkýlezden qaza tabatyndardyń sany 5,6 esege azaıǵanyn aıtqan bolatyn.
Aıta keteıik, keshe elordada Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy bastaldy. Halyqaralyq jıyn qatysýshylaryna Elbasy N.Nazarbaev vıdeojoldaý joldady.
