Qazaqstanda týberkýlezden bolatyn ólim-jitim bes ese azaıdy
ALMATY. KAZINFORM — Qazaqstanda keıingi 10 jylda týberkýlezden bolatyn ólim-jitim bes ese tómendedi. Bul týraly «Týberkýlez» komponenti boıynsha Jahandyq qor grantyn iske asyrý tobynyń menedjeri, medıtsına ǵylymdarynyń doktory, professor Shahımurat Ismaıylov aıtty.
2014 jylǵy 100 myń turǵynǵa shaqqanda 4,9 jaǵdaıdan 2025 jyly 0,9 jaǵdaıǵa deıin azaıǵan. Osy kezeńde aýrýdyń taralýy 2,5 ese qysqaryp, 100 myń turǵynǵa shaqqanda 105,9-dan 38,9-ǵa deıin tómendedi.
Shahımurat Ismaıylovtyń sózinshe, bul Ulttyq týberkýlezge qarsy baǵdarlamany júıeli túrde júzege asyryp, molekýlalyq-genetıkalyq dıagnostıka ádisterin engizip, týberkýlezge qarsy tıimdiligi joǵary jańa preparattardy qoldanyp, profılaktıkany kúsheıtkenniń arqasynda múmkin bolǵan.
— Qazaqstanda týberkýlezdi anyqtaýdyń jedel molekýlalyq-genetıkalyq ádisin engizip jatyr, tıimdiligi joǵary jańa preparattar qoldanylyp, profılaktıka jaǵy da jetildi. Bul bizge END TB strategııasynyń maqsatyna senimdi túrde ilgerileýge múmkindik beredi, — dedi Shahımurat Ismaıylov Almaty óńirlik kommýnıkatsııalar qyzmetinde ótken brıfıngte.
Ol týberkýlezben kúreske salynǵan ınvestıtsııalar medıtsınaǵa ǵana emes, ekonomıkalyq turǵydan da tıimdi sheshim ekenin aıtty.
— Týberkýlezben kúreske salynǵan ár dollar medıtsına salasy úshin 43 AQSh dollary kóleminde ekonomıkalyq paıda ákeledi. Ulttyq baǵdarlamany turaqty qarjylandyrý densaýlyq saqtaý júıesin tutastaı nyǵaıtýǵa yqpal etedi, — dedi ol.
Týberkýlezge qarsy is-sharalardy negizinen memleket qarjylandyrady. Bul shamamen 96-97%-daı bolady. Jahandyq qor jobalarynyń úlesi — 3-4%.
Eske salaıyq, buǵan deıin Almatyda týberkýlezben aýyrǵandar sany azaıǵanyn habarlaǵan edik.