Qazaqstanda týberkýlezdi emdeý merzimi qysqardy

ASTANA. KAZINFORM – Bıyl 6 aıda elimizde 8633 adam profılaktıkalyq em aldy, onyń ishinde 55% - balalar, 45% - eresekter. Bul týraly Densaýlyq saqtaý mınıstrliginiń ulttyq ftızıopýlmonologııa ǵylymı ortalyǵynyń dırektory, Densaýlyq saqtaý mınıstrliginiń shtattan tys bas ftızıatr-dárigeri Málik Ádenov málim etti.

- Týberkýlez ınfektsııasyn profılaktıkalyq emdeýdiń jańa tıimdi rejımi engizildi, ıaǵnı «Rıfapentın» preparatyn qoldana otyryp 6 aıdan 1-3 aıǵa deıin qysqarady. Bıyl 6 aıda 8633 adam profılaktıkalyq em aldy, onyń ishinde 55% balalar, 45% eresekter. Osylaısha, (DDU standartyna keminde 90% qol jetkizildi) profılaktıkalyq em 93 paıyz tıimdiligin kórsetti. Týberkýlez ınfektsııasyn profılaktıkalyq emdeý, ásirese týberkýlezge shaldyǵý qaýpi joǵary toptar arasynda aýrýdyń belsendi túriniń taralýyn jáne damýyn boldyrmaý jolynda sheshýshi ról atqarady, - dedi Málik Ádenov ortalyq kommýnıkatsııalar qyzmeti alańynda ótken baspasóz máslıhatynda.

Aıta keteıik, Qazaqstanda týberkýlezdi emdeý, dıagnostıkalaý tegin medıtsınalyq kómektiń kepildik berilgen kólemi sheńberinde tegin júrgiziledi.

- Odan bólek týberkýlez dertinen ınektsııalyq preparattardy qoldanbaı tıimdi emdeý rejımi bar. Sol sııaqty atalǵan dertti kóp dári-dármekpen emdeý merzimi 24 aıdan 9-12 aıǵa deıin qysqartyldy. Pretomanıd (BPaL/BPalM) preparatyn qoldana otyryp, Dúnıejúzilik densaýlyq saqtaý uıymy usynǵan dárige tózimdi týberkýlezdi emdeýdiń jańa rejımin engizý boıynsha pılottyq joba iske asyp jatyr, ol boıynsha emdeý merzimi 6 aıǵa deıin qysqartylady, - deıdi vedomstvo ókili.

Buǵan deıin habarlaǵanymyzdaı, bıyl alty aıda elimizde týberkýlez dertinen ólim-jitim 20 paıyz tómendedi. 

Al bıyl naýryzdaǵy esep boıynsha elimizde týberkýlezden ólim-jitim 50 paıyz azaıǵan. 

Sondaı-aq elimizde 158 myńǵa jýyq nárestege týberkýlezge qarsy vaktsına egildi. 

Aıta keteıik, AQSh ǵalymdary týberkýlezge qarsy kúreste úlken jetistikke jetti.