Qazaqstanda týberkýlezben syrqattaný deńgeıi 24 paıyzǵa tómendedi
ALMATY. QazAqparat- Elde sońǵy 5 jylda aýrýshańdyq 24 %-ǵa tómendedi. Bul týraly Almaty qalasynyń Óńirlik kommýnıkatsııalar qyzmetiniń alańynda ótken baspasóz konferentsııasynda Ulttyq ftızıopýlmonologııa ǵylymı ortalyǵynyń dırektory Málik Ádenov aıtty, dep habarlaıdy QazAqparat tilshisi.
Spıkerdiń sózinshe, týberkýlezden bolatyn ólim kórsetkishi 1,5 ese tómendedi. Sondaı-aq, balalardyń aýrýshańdyǵy 27 paıyzǵa azaıdy.
«Elimizde týberkýlezdi anyqtaý jáne dıagnostıkalaý úshin Dúnıejúzilik densaýlyq saqtaý uıymynyń sońǵy usynymdaryna sáıkes tekserýdiń barlyq dıagnostıkalyq ádisteri engizilgen. PTR dıagnostıkasy quryldy, ol týberkýlezdiń bar-joǵyn gendik deńgeıde 2 saǵat ishinde anyqtaýǵa jáne alǵashqy kúnnen bastap emdeýdi taǵaıyndaýǵa múmkindik beredi», - dep atap ótti Ulttyq ftızıopýlmonologııa ǵylymı ortalyǵynyń dırektory.
Aıýynsha,táýekel deńgeıi joǵary toptaǵy turǵyndardy skrınıngtik tekserýler táýekelderdi azaıtýǵa kómektesedi, eresekter flıýorografııadan, al balalar men jasóspirimder týberkýlezdiń aldyn alýǵa baǵyttalǵan dıagnostıkasynan ótedi.
Ambýlatorlyq jáne statsıonarlyq emdeýge qatysty barlyq medıtsınalyq mekemeler tıimdi emdeý úshin týberkýlezge qarsy preparattardyń qajetti keshenimen tolyq qamtamasyz etilgen. Sezimtal týberkýlezdi emdeý tıimdiligi 88,2%, dárige tózimdi týberkýlezdi emdeýdiń tıimdiligi 80,2% qurady.
Patsıentterge yńǵaıly bolý úshin ambýlatorlyq emdeý olardyń turǵylyqty jerine jaqyn ornalasqan medıtsınalyq mekemelerde júzege asyrylady.
«Máselen, búgingi tańda 7750 naýqas ambýlatorlyq em alady, onyń 1,9 paıyzy úıde, 2,6 paıyzy mobıldi brıgadada, 42,4 paıyzy smartfon arqyly beınebaqylaýda. Emdeý monıtorıngin kún saıyn ftızıatr dárigerler, medbıkeler jáne osyǵan jaýaptylar qadaǵalaıdy. Elimizde jergilikti atqarýshy organdardyń týberkýlezben aýyratyndarǵa aı saıyn áleýmettik qoldaý kórsetýi óte mańyzdy. Esepti kezeńde týberkýlezben aýyratyndardyń 97%-yna 1971,2 mln teńgege áleýmettik qoldaý kórsetildi»,- deıdi ol.
Sonymen qatar ol búgin, 24 aqpan – týberkýlezge qarsy kúres aılyǵy bastalǵanyn atap ótti.
