Qazaqstanda týberkýlezben syrqattanýshylyq 13%-ǵa, ólim-jitim 25%-ǵa tómendedi
ASTANA. KAZINFORM – Dúnıejúzilik týberkýlezge qarsy kúres kúni qarsańynda Densaýlyq saqtaý mınıstri Aqmaral Álnazarova Dúnıejúzilik densaýlyq saqtaý uıymynyń qoldaýymen ótken joǵary deńgeıdegi halyqaralyq dıalogqa qatysty.
Kezdesý barysynda memleketterdiń End TB jahandyq strategııasynyń maqsattaryna qol jetkizýi jáne týberkýlezben kúreste halyqaralyq yntymaqtastyqty kúsheıtý máseleleri talqylandy.
Mınıstr óz sózinde adam densaýlyǵyn qorǵaý úshin álemdik qaýymdastyq kúshterin biriktirýdiń mańyzy zor ekenin atap ótti.
«Qazaqstan End TB jahandyq strategııasy sheńberinde týberkýlezdiń aldyn alý, erte anyqtaý jáne tıimdi emdeý baǵytynda júıeli sharalardy kezeń-kezeńimen júzege asyryp keledi. Sońǵy jyldary elimizde týberkýlezge qarsy qyzmet aıtarlyqtaı jańǵyrtyldy», – dedi Aqmaral Álnazarova.
Búginde Qazaqstanda zamanaýı molekýlalyq-genetıkalyq dıagnostıka ádisteri engizilgen. Bul tehnologııalar birneshe saǵat ishinde aýrýdyń bar-joǵyn anyqtap qana qoımaı, qozdyrǵyshtyń dárilik preparattarǵa sezimtaldyǵyn da dál anyqtaýǵa múmkindik beredi. Qazirgi zerthanalyq dıagnostıka ádisteri ftızıopýlmonologııanyń barlyq óńirlik ortalyqtarynda qoljetimdi.
Mınıstrdiń aıtýynsha, qysqa merzimdi jáne tolyqtaı peroraldyq emdeý rejımderin qosa alǵanda, ınnovatsııalyq tásilderdi engizý emdeý uzaqtyǵyn qysqartyp, onyń tıimdiligin arttyrýǵa jáne patsıentterdiń ómir sapasyn jaqsartýǵa múmkindik berip otyr.
Aldyn alý sharalary da negizgi baǵyttardyń biri bolyp qala beredi. Qazaqstanda BTsJ vaktsınatsııasymen qamtý deńgeıi joǵary, týberkýlez ınfektsııasynyń profılaktıkalyq emi keńeıtilip, zamanaýı skrınıng tásilderi engizilýde.
Keshendi sharalardyń nátıjesinde elimizde negizgi epıdemıologııalyq kórsetkishter turaqty túrde tómendep keledi.
«Sońǵy úsh jyl ishinde týberkýlezben syrqattanýshylyq 13,3%-ǵa, ólim-jitim 25%-ǵa, al taralý deńgeıi 17,2%-ǵa azaıdy. Dárige sezimtal týberkýlezdi emdeýdiń tıimdiligi 90,5%, al dárige tózimdi túrinde 85,3% qurap otyr. Bul halyqaralyq standarttarǵa sáıkes keledi», – dep atap ótti mınıstr.
Vedomstvo basshysy qol jetkizilgen nátıjeler júıeli memlekettik saıasattyń, týberkýlezge qarsy is-sharalardy turaqty qarjylandyrýdyń jáne halyqaralyq uıymdarmen belsendi áriptestiktiń arqasynda múmkin bolǵanyn aıtty.
«Qazaqstan End TB jahandyq strategııasyn iske asyrýǵa berik beıildi bolyp qala beredi jáne ortaq maqsat – týberkýlezsiz álemge qol jetkizý úshin halyqaralyq yntymaqtastyqty jalǵastyra beredi», – dedi Aqmaral Álnazarova.
Aıta keteıik, elordada byltyr 500 adam týberkýlezge shaldyqqan.
