Qazaqstanda týberkýlezben kúres aılyǵy bastaldy

ALMATY. QazAqparat – Dúnıejúzilik týberkýlezge qarsy kúres kúnine arnalǵan aılyq 24 aqpanan 24 naýryzǵa deıin jalǵasady. Bul týraly Ulttyq ftızopýlmonologııa ortalyǵynyń dırektory Málik Ádenov aıtty, dep habarlaıdy QazAqparat tilshisi.

Aılyq aıasynda ftızıatr, ftızıopedıatrlardyń tegin keńesteri, turǵyndardy flıýorografııalyq tekseristen ótkizý sııaqty aýqymdy aktsııalar josparlanǵan.

«Patsıentterdiń emdelýge beıimdiligin arttyrý maqsatynda jergilikti atqarýshy organdar, úkimettik emes uıymdardyń kómegimen emdelýshilerdiń ambýlatorııalyq satysyndaǵylarǵa psıho-áleýmettik qoldaý kórsetildi. Oǵan qosa 2021 jyly naýqastardyń 92,0%-na áleýmettik kómek kórsetildi»,-dedi Málik Ádenov.

Spıker el halqyn aýrýdyń alǵashqy belgileri kezinde dereý medıtsınalyq kómekke júginýge shaqyrdy.

«Ýaqtyly anyqtaý jáne úzdiksiz emdeý kezinde týberkýlezdi tolyq emdeýge bolady. Týberkýlezben aýyrǵan adamdar basqalarǵa qaýip tóndirmeı, oqyp, jumys isteı alady, áıelder dúnıege deni saý bala ákele alady jáne tolyqqandy ómir súrýge múmkindik bar»,- dedi ol.