Qazaqstanda týberkýlezben aýyrý kórsetkishi 11,9 paıyzǵa azaıdy

ALMATY. QazAqparat - Qazaqstanda týberkýlezben aýyrý kórsetkishi 11,9 %-ke azaıdy. Bul týraly Týberkýlez problemalary ulttyq ortalyǵy dırektorynyń orynbasary Málik Adenov málim etti.

«Týberkýlezge qarsy sharalardyń, baǵdarlamanyń arqasynda Qazaqstanda aýrý kórsetkishi 2014 jylmen salystyrǵanda 11,9 %-ǵa, ólim-jitim kórsetkishi 22,4 %-ǵa azaıdy. Bul sharalar QR 2014-2020 jyldardaǵy týberkýlezge qarsy kúres keshendi jospary aıasynda júzege asyrylyp otyr. 2015 jyldyń sońynda da epıdemıologııalyq kórsetkish tómendep jatyr», - dedi Málik Adenov.

Onyń aıtýynsha, kórsetkishterdiń tómendeýi elimizdiń barlyq aımaqtarynda, barlyq adamdar sanatynda baıqalyp otyr. 12 aımaqta bir ýaqytta 457 adamdy qabyldaı alatyn 32 kúndizgi statsıonar bar. Qazaqstanda qurt aýrýy asqynǵan 1 adamdy emdeýge jylyna 1,9 mln teńge jumsalady.

DSU ókilderiniń sońǵy baǵalaý sapary barysynda sarapshylar Qazaqstandaǵy qolǵa alynǵan jumystarǵa óte joǵary baǵa berdi.

«DSU ókilderi Qazaqstannyń kóp jetistikke jetkenine kóz jetkizdi. Onyń ishinde dıagnostıka, emdeý, balalar aýrýyn azaıtý t.b. bar. Ásirese, kadrlar daıyndaý, statsıonarlyq emdeýden ambýlatorlyq emdeýge kóshý, qabyldanyp jatqan baǵdarlamalar bar. Dárilerdi jetkizý, tıimdi paıdalaný barlyǵy jolǵa qoıylǵan», - dedi M..Ádenov.