Qazaqstanda týberkýlez týraly múldem umytatyn kezdi armandaımyn - Ǵanı Qasymov
ALMATY. 17 naýryz. QazAqparat /Áıgerim Ámir/ - Búgin senator, QR Prezıdenttigine úmitker Ǵanı Qasymov «Infektsııaǵa qarsy preparattardyń ǵylymı ortalyǵy» qyzmetkerlerimen kezdesti.
Senator qyzmetkerler men Ortalyqtyń jaǵdaıy, sondaı-aq, onyń zertteý jumystarymen tanysty. Olardyń usynystaryn tyńdap, oılarymen bólisti.
«Ortalyq - jas ǵalymdar jáne óz eliniń naǵyz patrıottary qyzmet etetin joǵary tehnıkaly ǵylymı ujym. Meniń oıymsha, Qazaqstannyń ǵylymı bolashaǵy senimdi azamattardyń qolynda. Qazaqstanda týberkýlez týraly múldem umytatyn kezdi armandaımyn. Men árqashan osy zerthananyń ǵalymdaryn qoldap kelemin jáne qoldaıtyn bolamyn. Sebebi, olardyń jumystary bizdiń ulttyń densaýlyǵy úshin asa qajetti», - dedi QR Prezıdenttigine úmitker Ǵanı Qasymov.
Infektsııaǵa qarsy preparattardy zertteý jobasynyń jetekshisi, medıtsına ǵylymdarynyń doktory, professor, Qazaqstan Jaratylystaný ǵylymdary Ulttyq akademııasynyń akademıgi M.E. Qulmanovtyń aıtýynsha, terapevtıkalyq áser etý mehanızmin zertteý aıasynda dári-dármek FS-1 týberkýlez mıkobakterııasyna tikeleı áser etetindigi, murajaı jáne týberkýlezdyń klınıkalyq mýltırezıstentti mıkobakterııalar shtammdaryna joǵary bakterıotsıdti jáne bakterıostatıkalyq belsendilik kórsetetini zerttelgen. Sondaı-aq, FS-1 preparatynyń deni saý eriktilerge klınıkalyq synaǵynyń birinshi fazasynyń GCP prıntsıpterine saı ótkizý barysynda FS-1 preparatyn bir rettik jáne kóp rette peroraldy qabyldaǵanda jalpy toksıkalyq áseri joqtyǵy jáne jeke aǵzalardyń qalypty morfologııasymen fýnktsııasynyń keri áser etpeıtini kórsetilgen. Sonymen qatar, spetsıfıkalyq emes ımmýnıtettiń belsendiligi kúsheıetini baıqalǵan.
Atalmysh ortalyq 2004 jyly Elbasy tapsyrmasymen qurylǵan. Onyń mindeti - medıtsınalyq preparattardy teorııa júzinde josparlaýdan bastap, hımııa salasy boıynsha bıomaterıaldar jáne bıopreparattardyń skrınıngin júrgizetin akademııalyq zertteýler jasaıtyn ǵylymı-zertteýlik, ǵylymı-synaq júrgizetin, jańa túrdegi ǵylymı-óndiristik qurylymy bolyp tabylady. Іs- árekettiń sońy - tájirıbelik óndiris qurý jáne daıyn ónimderdi kommertsııalaý.
