Qazaqstanda týberkýlez saldarynan týyndaıtyn ólim-jitim 66 paıyzǵa tómendedi
«Respýblıkada Táýelsizdiktiń alǵashqy jyldarynda týberkýlezdiń negizgi epıdemıologııalyq kórsetkishi boıynsha 2002 jylǵy eń joǵarǵy kórsetkishpen (100 myń turǵynǵa shaqqanda syrqattaný kórsetkishi - 165,1, aýrýdan bolǵan ólim - 24,2) jaǵymsyz dınamıka anyqtalǵan bolatyn. 2003 jyldan búgingi kúnge deıin jyl saıyn atalǵan kórsetkishtiń turaqty túrde tómendeýi baıqalady (syrqattaný - 3 ese, ólim - 6 ese tómendedi)»,-delingen QR Densaýlyq saqtaý jáne áleýmettik damý mınıstrligi málimetinde.
Atap aıtqanda, qazirgi tańda elimizde 2014-2020 jyldarǵa arnalǵan týberkýlezben kúresýdiń keshendi jospary júzege asyrylyp keledi. Aımaqtardaǵy barlyq medıtsınalyq uıymdar aýrýlardy, onyń ishinde dárilik turaqty formalaryn dıagnostıkalaýdyń zamanaýı qurylǵylarymen qamtamasyz etilgen. Týberkýlezge qarsy preparattardyń kólemi de jetkilikti.
Jyl saıyn aımaqtardaǵy jergilikti atqarýshy organdar ambýlatorlyq jaǵdaıda em qabyldaıtyn týberkýlezben syrqattanǵan adamdarǵa kórsetiletin áleýmettik kómekti qarjylandyrýdy ulǵaıtyp otyr. Máselen, 2015 jyly áleýmettik qoldaýǵa 714 mln. 97,2 myń teńge bólindi. Al 2014 jyly bul soma 553 mln. 600,8 myń teńgeni quraǵan bolatyn.
«Aıta ketý kerek, Qazaqstandaǵy týberkýlezben tıimdi kúresý jalpymemlekettik sıpatta sondaı-aq, memlekettiń áleýmettik saıasatyndaǵy mańyzdy ári basym baǵyttarynyń biri bolyp qala bermek»,-deıdi mınıstrlik ókilderi.