Qazaqstanda týberkýlez dertiniń aldyn alý aılyǵy bastaldy
ALMATY. 29 aqpan. QazAqparat - 23 naýryzǵa deıin týberkýlez profılaktıkasynyń aılyǵy ótedi. Shara barysynda ókpe qurty aýrýynyń aldyn alýǵa arnalǵan birqatar is-sharalar uıymdastyrylady.
Bul týraly Almatyda ótken arnaıy baspasóz máslıhatynda Salaýatty ómir saltyn qalyptastyrý máseleleri Ulttyq ortalyǵynyń dırektory Jámıla Battaqova málim etti.
Onyń aıtýynsha, sharanyń negizgi maqsaty - halyqty ókpe qurty dertinen habardar etý, der kezinde medıtsınalyq kómekke júginýge shaqyrý, halyq arasynda, ásirese jastar arasynda salaýatty ómir saltyn dáripteý, qoǵam nazaryn týberkýlez máselesine aýdarý, Qazaqstandaǵy qurt aýrýymen baılanysty jaǵdaıdy jaqsartý úshin búkil qoǵam kúshin jumyldyrý bolyp tabylady.
Atalmysh shara týberkýlez aýrýymen búkilálemdik kúres kúnine oraı (24 naýryz) Salaýatty ómir saltyn qalyptastyrý máseleleriniń Ulttyq ortalyǵy men Týberkýlez máseleleriniń Ulttyq ortalyǵynyń uıymdastyrýymen arnaıy ótkizilmek.
Mamandardyń aıtýynsha, ótken 2011 jyly týberkýlezden 1 477 adam kóz jumsa, jyl basynan beri 188 adam qaıtys bolǵan. Al, búgingi tańda Qazaqstanda bul dertke shaldyqqan 27 myń adam tirkelgen.
