Qazaqstanda týberkýlez aýrýynyń deńgeıi tómendep, alkogol paıdalaný kórsetkishi azaıyp keledi - DDU ókili

Bul týraly búgin Parlament Senatynyń Áleýmettik-mádenı damý komıtetiniń bastamasymen  elimizdiń densaýlyq saqtaý salasyna tehnologııalardy berý jónindegi jobalardy iske asyrý jáne  ınstıtýttyq reformalardy júrgizý máseleleri boıynsha ótken úkimet saǵatynyń barysynda Dúnıejúzilik densaýlyq saqtaý uıymynyń Qazaqstandaǵy keńsesiniń basshysy Melıta Výınovıch málim etti.

DDU ókiliniń aıtýynsha, Qazaqstan men Halyqaralyq Qaıta qurý jáne damý banki arasyndaǵy kelisimniń nátıjesinde júzege asqan ońtaıly saıasat pen tıimdi ınnovatsııanyń, sondaı-aq ınvestıtsııanyń durys baǵytynyń arqasynda densaýlyq saqtaý júıesindegi progress nyǵaıǵanyn kórsete aldy. «Qoǵamdyq densaýlyq saqtaý reformasy qazirdiń ózinde belgili bir jaǵymdy nátıjelerge ıe. Máselen, biz Qazaqstanda týberkýlezben aýrýynyń azaıǵanyn, alkogol paıdalaný deńgeıiniń tómendegenin baıqap otyrmyz. Sonymen qatar, tipti Qazaqstannyń densaýlyq saqtaý júıesindegi tájirıbesi birqatar damyǵan elder úshin de úlgi bolarlyq», - deıdi M. Výınovıch. Onyń sózine qaraǵanda,  qazir Dúnıejúzilik densaýlyq saqtaý uıymy bútkil eýropalyq óńiri úshin óziniń densaýlyq saqtaý strategııasyn qaıta qarastyryp jatyr.  «Sondyqtan da, qazaqstandyq sarapshylar bul strategııa jobasyna konsýltant retinde qatystyrylyp otyr», - deıdi ókil.