Qazaqstanda týa bitti júrek demikpesi bar balalardyń shetineý kórsetkishin azaıtýǵa baǵyttalǵan baǵdarlama jasaldy
ALMATY. Tamyzdyń 24-i. QazAqparat /Názıra Eleýhan/ - Qazaqstanda jyl saıyn 3000-nan astam bala týa bitti júrek aqaýymen dúnıege keledi. Onyń 10-15 paıyzy ǵana bir jasqa deıin ómir súredi. Sol sebepti, qazirgi ýaqytta aýrýdyń aldyn alýǵa arnalǵan sapaly perınataldy dıagnostıkalaý qajettiliginiń ýaqyty jetti.
Bul týraly búgin Almatyda ótken arnaıy baspasóz máslıhatynda №1-shi qalalyq perzenthananyń reanımatsııa bóliminiń meńgerýshisi Sulýshash Sasaeva aıtty, dep habarlaıdy QazAqparat.
Onyń aıtýynsha, der kezinde perınataldy dıagnostıkalaý men operatsııa arqyly túzeý jáne klınıka jaǵdaıyndaǵy jaqsy kútim balany aman-esen alyp qalýǵa múmkindik beredi. "Ondaı patsıentterdiń basym bóligi emdelgennen keıin áleýmettik ómirge beıimdelip, shamamen 60 paıyzy derlik saýyǵyp ketedi", dedi ol.
"Dom" qoǵamdyq qory men «Merı Keı (Qazaqstan)» kompanııasy jáne №1-shi qalalyq perzenthana men bastamashyl dárigerler toby týa bitti júrek aqaýymen dúnıege kelgen balalardyń ólimin azaıtýǵa baǵyttalǵan baǵdarlama jasady. "Dom" qoǵamdyq qorynyń dırektory Arýjan Saınnyń aıtýynsha, bul baǵdarlama - eń aldymen, erikti dárigerlerdiń beıresmı, memlekettik emes "Erikti dárigerler" birlestigin qurý bolyp tabylady.
"Bul birlestik óz mamandyǵy aıasynda dertke ushyraǵan balalarǵa kómek kórsetip, der kezinde dıagnostıka jasaýǵa, emdeýge jáne taǵy da basqa medıtsınalyq kómek alýlaryna járdemdesip, balalar úshin barlyq kúsh-jigerin salatyn bolady", dedi Arýjan Saın.
Onyń aıtýynsha, baǵdarlama aıasynda qor №1-shi qalalyq perzenthananyń ÝDZ-diń eki mamany men bir kardıolog-neonatologty bıylǵy jyldyń qyrkúıegi men kelesi jyly aqpan aıynda sheteldik klınıkaǵa oqýǵa jibermekshi. "Barlyq shyǵyndardy bizdiń qor óz moınyna alady. Sonymen qatar, bizdiń baǵdarlamanyń demeýshisi «Merı Keı (Qazaqstan)» kompanııasy №1-shi perzenthanaǵa shuǵyl qajetti dıagnostıkalyq jabdyqtardy, naqtyraq aıtqanda ÝDZ «Mindray DC-3» skanerdi syıǵa tartady. Bul jabdyqtyń kómegimen ana qursaǵynda jatqan balada týa bitti júrek aqaýy bar-joǵyn anyqtaýǵa bolady. Dıagnostıkalaý tegin júrgiziletin bolady. Bul oraıda, jabdyqty usynǵan «Rusema» JShS-niń úlken jeńildikterdi usynǵandyǵyn atap ótkim keledi. Balalardy qutqarý máselesinde kommertsııalyq múdde ekinshi qatarǵa shyǵyp qalatyndyǵyn dáleldeıdi", dep atap ótti Arýjan Saın.
Ol sondaı-aq, jańa týǵan balaǵa Qazaqstanda operatsııa jasaý múmkin bolmaǵan jaǵdaıda Tomsk jáne Novosibir ǵylymı zertteý ınstıtýttarymen baılanys ornatylatyndyǵyn habarlady. "Áıelderge keńes berý mekemeleriniń mamandaryn, neanotologtardy jáne balalar kardıohırýrgtaryn aqparattandyrý jáne oqytý kelesi jyldyń aqpan aıyna deıin júrgiziletin bolady. Júkti áıelder BAQ-y men keńes berý kabınetteri arqyly aqparat ala alady", dedi ol.
QR Balalar hırýrgııasy jáne pedıatrııa ǵylymı ortalyǵynyń aǵa ǵylymı qyzmetkeri, kardıohırýrg Gúljan Sársenbaevanyń aıtýynsha, bul baǵdarlama elimizde jumys isteýi kerek. "Eger biz balanyń qursaqta jatqan kezinde bul aýrýdyń bar-joǵyn anyqtap, arnaıy sharalardy qoldansaq, qazaqstandyq balalardyń bul qaýipti dertten ólim deńgeıi azaıar edi", dep atap ótti ol.
