Qazaqstanda «TsON» mobıldi qosymshasyn paıdalanýshylar sany 670 myńǵa jýyqtady

ORAL. KAZINFORM – Qazaqstanda «TsON» mobıldi qosymshasynyń jańa servısin úsh aptada 4 500-ge jýyq adam paıdalandy.

«Azamattarǵa arnalǵan úkimet» memlekettik korporatsııasy» KEAQ BQO fılıalynan málim etkenindeı, bıylǵy 28 sáýirden bastap «TsON» mobıldi qosymshasynda zeınetaqy men járdemaqy túrlerin esepteıtin paıdaly servıs iske qosyldy. Bul azamattarǵa úıden shyqpaı-aq aldyn ala áleýmettik tólemderdiń mólsherin shamalaýǵa múmkindik beredi.

Qyzmet iske qosylǵan sátten bastap 4 470 adam esepteýler júrgizip úlgerdi. Búgingi tańda kalkýlıator arqyly 8 áleýmettik tólem/járdemaqy men zeınetaqy túrleri boıynsha 5 negizgi sanatty esepteýge bolady:

• zeınetke shyǵý: bazalyq, yntymaqty jáne jınaqtaýshy zeınetaqy;
• bala týý: júktilikke, bosanýǵa nemese bala asyrap alýǵa baılanysty tabystan aıyrylý kezindegi tólem, sondaı-aq 1,5 jasqa deıingi bala kútimi boıynsha járdemaqy;
• múgedektik: eńbekke qabilettiliginen aıyrylý jaǵdaıyndaǵy áleýmettik tólem;
• jumyssyz qalý: jumysynan aıyrylý jaǵdaıy boıynsha áleýmettik tólem;
• jaqyn adamynan aıyrylý: asyraýshysynan aıyrylý jaǵdaıy boıynsha tólem.

Esepteý paıdalanýshy engizgen derekter negizinde júrgiziletindikten, tólem nátıjesi shamamen kórsetiledi jáne aqparattyq sıpatta beriledi. Áleýmettik tólemderdiń naqty mólsheri ýákiletti memlekettik organǵa ótinish berýshi usynǵan málimetter negizinde eseptelip, resmı túrde taǵaıyndalady.

Qyzmetti paıdalaný úshin «TsON» mobıldi qosymshasyn (Google Play jáne App Store-da qoljetimdi) júktegennen keıin memlekettik bıometrııalyq sáıkestendirý servısi arqyly avtorızatsııadan ótý qajet. Odan keıin tıisti bólimdi tańdap, qajetti derekterdi engizý kerek.

«TsON» mobıldi qosymshasy elektrondyq qyzmetterge jyldam qol jetkizýge múmkindik beretin jan-jaqty tsıfrlyq arna retinde qarqyndy damyp keledi.

- Suranysqa ıe qyzmetterdiń biri - HQKO-ǵa kezekke turý maqsatynda aldyn ala brondaý. Apta saıyn qosymsha arqyly shamamen 60 myń elektrondyq talon beriledi, bul kezekte kútý ýaqytyn edáýir qysqartyp, qyzmet kórsetý jyldamdyǵyn arttyrýǵa múmkindik beredi.

Sondaı-aq júrgizýshi kýáligin alý úshin qajetti emtıhanǵa jazylý qyzmeti keńinen qoldanylýda. Apta saıyn teorııalyq emtıhanǵa 8 myńnan astam, al tájirıbelik emtıhanǵa shamamen 7 myń adam jazylady.

Sonymen qatar synamalyq júrgizý tájirıbesine tirkelý qyzmetin apta saıyn orta eseppen 1 600 adam paıdalanady. Qazirgi ýaqytta «TsON» mobıldi qosymshasyn 670 myńǵa jýyq paıdalanýshy júktep, belsendi túrde qoldanýda, - dep habarlady vedomstvodan.

Eske sala keteıik, budan buryn jyljymaıtyn múliktiń biryńǵaı memlekettik kadastry boıynsha 100 mln ótinim túskenin jazǵan bolatynbyz.