Qazaqstanda tsıfrlyq jáne AI-sport federatsııasy quryldy
ASTANA. KAZINFORM — Qazaqstanda oqýshylar arasynda onlaın sport jarystaryn ótkizýge múmkindik beretin AI Sport platformasy damyp keledi. Joba balalardy buqaralyq sportqa tartýdy, olardyń fızıkalyq qabiletin baǵalaýdy jáne sporttyń ózine laıyq túrin tańdaýǵa kómektesýdi kózdeıdi.
Bul týraly AI-sport federatsııasynyń prezıdenti Ǵabıt Saltybaev Jibek Joly telearnasynyń «Búgin.LIVE» baǵdarlamasynda aıtty.
Onyń aıtýynsha, mektepterde sporttyq jarystar men spartakıadalar kóbine oflaın formatta ótedi. Sonyń saldarynan barlyq oqýshynyń qatysýyna múmkindik bola bermeıdi. Al onlaın platforma bul shekteýdi azaıtyp, sportpen aınalysqysy keletin balalardyń barlyǵyna jol ashady.
— Máselen, bir mektepte 2 myń oqýshy bolsa, jarysqa olardyń shamamen 10 paıyzy ǵana qatysýy múmkin. Al onlaın formatta áldeqaıda kóp balaǵa múmkindik berýge bolady. Bizdiń maqsatymyz — buqaralyq sportty qoljetimdi etý, — dedi Ǵabıt Saltybaev.
Qazir platformada bes sport túrin tsıfrlandyrý jumysy júrip jatyr. Joba aıasynda 57 jattyǵý ázirlengen. Alǵashqy onlaın jarys ústel tennısinen uıymdastyrylyp, jeńimpazdar da marapattalǵan. Endi jarystardy el kóleminde jáne halyqaralyq deńgeıde ótkizý josparlanyp otyr.
*Jasandy ıntellekt balanyń sportqa beıimin anyqtaıdy*
Platformanyń taǵy bir múmkindigi — oqýshylardyń fızıkalyq qabileti men qımyl-qozǵalysyn taldaý. Jasandy ıntellekt jattyǵýdy oryndaý barysyn baǵalap, balanyń qaı sport túrine beıimi baryn anyqtaýǵa kómektesedi.
— Jarysqa qatysýshylardyń fızıkalyq múmkindikteri men qımyl erekshelikterin taldaımyz. Jasandy ıntellekt arqyly balanyń qaı sport túrine ıkemi baryn anyqtaýǵa bolady. Osy málimetterdi sport federatsııalarymen bólisip, qabileti joǵary balalardy tıisti sport túrlerine usynýdy kózdep otyrmyz, — dedi federatsııa prezıdenti.
Onyń sózinshe, mundaı taldaý balalardyń áleýetin erterek baıqap, sporttyq qabiletin damytýǵa múmkindik beredi.
Onlaın jarystar halyqaralyq deńgeıde ótedi
AI Sport platformasynda oqýshylar jattyǵýlardy kamera arqyly oryndaıdy. Júıe olardyń qımylyn baǵalap, nátıjesin esepteıdi. Jattyǵýdy oryndaý kezinde qate jiberilse, platforma ony arnaıy belgi arqyly kórsetedi. Osylaısha qatysýshy óz nátıjesin baqylap, qaı tusta qateleskenin kóre alady.
Aldaǵy ýaqytta balalardy sportqa qyzyqtyrý úshin túrli chellendjder men marafondar ótkizý josparlanǵan. Onlaın format álemniń ár túkpirindegi oqýshylardyń bir jarysqa qatysýyna múmkindik beredi.
Joba avtorlarynyń maqsaty — tsıfrlyq tehnologııalardy paıdalana otyryp, sportpen aınalysatyn balalardyń sanyn arttyrý jáne olardyń qabiletin damytýǵa jaǵdaı jasaý.
Aıta keteıik, keńse qyzmetkerlerin JI arqyly sportqa tartýdyń joly tabyldy.
