Qazaqstanda tsıfrlyq mektepter damıdy: Google sheshimderi engizilmek
ASTANA. KAZINFORM — Oqý-aǵartý mınıstri Juldyz Súleımenova jumys saparymen Qazaqstanǵa kelgen Google for Education kompanııasynyń Ulybrıtanııa, Eýropa jáne Ortalyq Azııa boıynsha dırektory Anna Artemevamen kezdesti. Bul týraly vedomstvonyń baspasóz qyzmeti málim etti.
Sonymen qatar basqosýǵa Bilim berýdi turaqty damytý qorynyń dırektory Danııar Toqtarbaev qatysty. Taraptar bilim berý júıesin tsıfrlyq transformatsııalaý, zamanaýı tehnologııalyq sheshimderdi oqý protsesine engizý jáne bilim berý ınnovatsııalary salasyndaǵy yntymaqtastyqty talqylady. Mınıstr elimizdiń orta bilim berý salasyndaǵy jasandy ıntellekt tehnologııalaryn damytý josparlarymen bólisip, Google kompanııasynyń bastamalaryn talqylady.
— Biz Google kompanııasyn «Keleshek mektepteri» jobasy aıasynda birlese jumys jasaýǵa shaqyramyz. El aýmaǵynda Memleket basshysy Qasym-Jomart Toqaevtyń tapsyrmasymen 217 mektep salyndy. Sol mektepterdiń 84- i aýyldarda ornalasqan. Sonymen qatar bizde shaǵyn jınaqty mektepter bar. Aýyldarda barlyǵy 6 myńnan astam mektep ornalasqan. Qazir biz úshin startegııalyq basymdyqtardyń biri aýyl men qala mektepteri arasyndaǵy alshaqtyqty joıý, — dedi Juldyz Súleımenova.
Kezdesý barysynda Google kompanııasynyń ónimderine negizdelgen Google Classroom, Gemini, Notebook LLM jáne ózge de jasandy ıntellektige negizdelgen sheshimder tanystyryldy. Chromebook noýtbýkterin oqý protsesinde qoldanýdyń praktıkalyq stsenarııleri kórsetildi. Bul tehnologııalar zamanaýı tsıfrlyq mekteptiń tıimdi quraly bola alady.
Qazirgi tańda Google for Education Bilim berý salasyn turaqty damytý qory men «Órleý» biliktilikti arttyrý ulttyq ortalyǵymen birlesip Digital Bala pılottyq jobasy júzege asyrylýda. Ol jobanyń aıasynda mektepterde oqý protsesin avtomattandyrýǵa jáne muǵalimder men oqýshylar arasynda ınteraktıvti baılanys ornatýǵa múmkindik beretin IT-quraldar engizilmek.
Eske sala keteıik, buǵan deıin QR Ǵylym jáne joǵary bilim mınıstri Google kompanııasynyń ókilderimen kezdesý ótkizip, taraptar joǵary bilimdi tsıfrlandyrý jáne jasandy ıntellekt tehnologııalaryn engizý salasyndaǵy yntymaqtastyqty damytý perspektıvalaryn talqylaǵan bolatyn.