Qazaqstanda tsıfrlyq málimetterdi almasýǵa arnalǵan platformalar tirkeldi
ASTANA. KAZINFORM – Qazaqstanda tsıfrlyq derekter ónimderiniń almasýy men aınalymyna arnalǵan alǵashqy tórt platforma memlekettik tizilimge tirkeldi. Osylaısha, elimizde retteletin derekter naryǵy qalyptasa bastady.
Bul týraly Tsıfrlyq kodeks erejelerin iske asyrýǵa arnalǵan konferentsııada QR Strategııalyq josparlaý jáne reformalar agenttigi Ulttyq statıstıka bıýrosynyń basshysy Maqsat Turlybaev málimdedi.
Onyń aıtýynsha, alǵash tirkelgen platformalardyń qatarynda MedHub, Astana Data Exchange (ADX) jáne Kompra bar.
MedHub ǵylymı zertteýlerde, taldaý jumystarynda jáne densaýlyq saqtaý salasyndaǵy tsıfrlyq sheshimderdi ázirleýde ıesiz medıtsınalyq derekterdi qaýipsiz almasýǵa ári paıdalanýǵa arnalǵan.
Astana Data Exchange (ADX) platformasy tsıfrlyq derekter ónimderin ornalastyrýǵa, izdeýge, almasýǵa jáne kommertsııalandyrýǵa múmkindik beredi.
Al Kompra mundaı ónimderdi kontragentterdi tekserý, táýekelderdi baǵalaý jáne basqarýshylyq sheshimder qabyldaý úshin paıdalanady.
– Alǵash tirkelgen platformalar Tsıfrlyq kodeks erejeleriniń is júzinde júzege asyryla bastaǵanyn kórsetedi. Ulttyq derekter naryǵynyń alǵashqy elementteri qalyptasty. Bul tsıfrlyq ekonomıkanyń damýyna, derekterdi strategııalyq aktıv retinde keńinen paıdalanýǵa jáne jasandy ıntellekt negizindegi jańa servısterdi engizýge yqpal etedi, – dedi Maqsat Turlybaev.
Ulttyq statıstıka bıýrosynyń basshysy mundaı platformalar qyzmetin habarlama tártibimen bastaı alatynyn túsindirdi.
Onyń aıtýynsha, menshik ıesi nemese ıelenýshi elektrondyq lıtsenzııalaý aqparattyq júıesi arqyly tıisti habarlama joldaıdy. Bul ákimshilik kedergilerdi azaıtýǵa múmkindik beredi. Al ýákiletti organ zańnama talaptarynyń saqtalýyna keıingi baqylaý júrgizedi.
Derekter qaýipsizdigine qatysty da jekelegen talaptar belgilengen. Platforma ıeleri derbes derekter týraly zańnama men kıberqaýipsizdik talaptaryn saqtaýǵa, jasalatyn mámilelerdiń zańdylyǵyn qamtamasyz etýge jáne qatysýshylardy jumys qaǵıdalary týraly habardar etýge mindetti.
Sonymen birge tsıfrlyq derekter ónimderi óńdelip, qurylymdalǵan bolýy, sapa talaptaryna saı kelýi jáne adamnyń aty-jónin anyqtaýǵa múmkindik beretin derbes derekterdi qamtymaýy tıis.
Maqsat Turlybaevtyń aıtýynsha, mundaı platformalardyń damýy bızneske tsıfrlyq derekter ónimderin zańdy túrde paıdalanýǵa, olardy kommertsııalandyrýǵa jáne solardyń negizinde jańa servıster ázirleýge múmkindik beredi. Al memleket jasandy ıntellektini engizýdi jedeldetip, tsıfrlyq qyzmetterdiń tıimdiligin arttyra alady.
Eske salaıyq, 2026 jylǵy 12 shildeden bastap Qazaqstanda Tsıfrlyq kodeks resmı túrde kúshine endi. Qujat tsıfrlyq tehnologııalardy júıeli damytýǵa, jasandy ıntellektini keńinen engizýge jáne ornyqty tsıfrlyq ortany qalyptastyrýǵa negiz qalady.
