Qazaqstanda tsıfrlyq qarjy aktıvterin retteıtin talaptar kúshine enedi
ASTANA. KAZINFORM – Qazaqstandaǵy steıblkoınderdi Ulttyq bank retteıdi. Bul týraly Kazinform agenttiginiń BIZDIÑ ORTA podkastynda Ulttyq banktiń ınnovatsııalar boıynsha sarapshysy Baqyt Smekenov málim etti.
– Halyqaralyq tájirıbege qarasaq, keńinen taraǵan steıblkoındar dollarǵa baılanǵan aktıvter sanalady. Olardyń tabysty bolýynyń faktory – ol fıattyq rezervterdiń ashyqtyǵy. Bul rette, qaı bankte ornalastyrylǵany, qansha somada qamytylǵany, steıblkoındi shyǵarý kólemine qanshalyqty qamtamasyz etkeni, steıblkoındi shyǵaratyn emıtentterdiń jarııa eseptiligi eskeriledi. Bizde steıblkoındardy Ulttyq bank retteıtin bolady. Osy oraıda eki baǵyt boıynsha zańnamalyq túzetýlerdi daıyndap, Parlamentke engizdik. Bul turǵyda bankter týraly jańa zań jobasyna ilespe qujat aıasynda tıisti ózgeristerdi qarastyrdyq, - dedi B. Smekenov.
Onyń aıtýynsha, atalǵan túzetý boıynsha tsıfrlyq qarjy aktıvterin iske qosý men qamtamasyz etilmegen krıptoaktıvterdiń aınalymyn engizý eskerilgen.
– Bolashaqta osy baǵyt boıynsha tolyqqandy retteýshi baza bolady. Bul baza negizinde ártúrli steıblkoındar men basqa da tsıfrlyq qarjy aktıvterin retteıtin talaptar kúshine enedi. Bul erejeler aıasynda krıptoprovaıderlerdiń jumysyn retteıtin talaptardy qoıamyz. Sonymen qatar táýekelderdi basqarý boıynsha tetikter iske qosylady, - dedi UB ókili.
Eske salsaq, bıyl qyrkúıek aıynda Qazaqstanda teńgege baılanǵan alǵashqy steıblkoın iske qosyldy.
Bul turǵyda Eýrazııalyq banktiń basqarma tóraǵasy Lázzat Satıeva teńgege baılanǵan steıblkoındi paıdalaný múmkindigi jaıynda túsindirdi.