Qazaqstanda tsıfrlyq derekter naryǵy qalaı jumys isteıdi
ASTANA. KAZINFORM – Qazaqstanda ulttyq tsıfrlyq derekter naryǵyn qalyptastyrý men onyń jumys isteýine arnalǵan normatıvtik baza quryldy. Jańa erejeler arnaıy tsıfrlyq platformalar arqyly derekterdi paıdalaný jáne almasý tártibin aıqyndaıdy.
Bul týraly Tsıfrlyq kodekstiń erejelerin iske asyrýǵa arnalǵan konferentsııada QR Strategııalyq josparlaý jáne reformalar agenttigi Ulttyq statıstıka bıýrosynyń basshysy Maqsat Turlybaev málimdedi.
Onyń aıtýynsha, búginde derekter kapıtal, tabıǵı resýrstar men ınfraqurylym sııaqty strategııalyq aktıvke aınalyp keledi. Olar jasandy ıntellektini damytýǵa, tsıfrlyq servısterdi jetildirýge, zamanaýı basqarýshylyq sheshimder qabyldaýǵa jáne tsıfrlyq ekonomıkany damytýǵa negiz bolyp otyr.
Sonymen qatar Tsıfrlyq kodeks qabyldanǵanǵa deıin Qazaqstanda tsıfrlyq derekter ónimderimen almasý júzege asyrylatyn platformalardyń jumysyna qatysty biryńǵaı qaǵıdalar bolǵan joq. Sondaı-aq osy naryqqa qatysýshylar arasyndaǵy qatynastar keshendi túrde rettelmegen edi.
— Jasandy ıntellektiniń damýy, memlekettik basqarýdy tsıfrlandyrý, derekter kóleminiń ulǵaıýy jáne jańa tsıfrlyq servısterdiń paıda bolýy olardy paıdalanýdyń zamanaýı quqyqtyq negizin qalyptastyrýdy talap etti, — dedi Ulttyq statıstıka bıýrosynyń basshysy.
Onyń aıtýynsha, bul mindetti Qazaqstan Respýblıkasynyń Tsıfrlyq kodeksi sheshýge baǵyttalǵan. Qujatqa bıyl qańtarda Memleket basshysy qol qoıyp, shilde aıynda kúshine endi.
Atap aıtqanda, alǵash ret zańnamalyq deńgeıde tsıfrlyq derekter ónimderin almasý jáne aınalymǵa arnalǵan platformalardyń quqyqtyq mártebesi, tsıfrlyq derekter ónimi uǵymy, derekter ekonomıkasyn damytý jónindegi ýákiletti organnyń ókilettikteri, sondaı-aq osy naryqtyń jumys isteýiniń negizgi qaǵıdattary aıqyndaldy.
— Osylaısha, Qazaqstanda zamanaýı derekter ekonomıkasyn qalyptastyrýdyń negizi qalandy, — dedi Maqsat Turlybaev.
Jańa normalarǵa sáıkes, tsıfrlyq derekter ónimderin almasý jáne aınalymǵa arnalǵan platforma – mundaı ónimderge qoljetimdilikti qamtamasyz etip, olardy almasýǵa ári paıdalanýǵa múmkindik beretin tsıfrlyq alań.
Tsıfrlyq derekter ónimi – derekterdi óńdeý nátıjesinde alynǵan, ári qaraı paıdalanýǵa jáne almasýǵa jaramdy óńdelgen ári jınaqtalǵan nátıje.
Jańa naryqqa tsıfrlyq derekter ónimderin jetkizýshiler men tutynýshylar, sondaı-aq tıisti platformalardyń menshik ıeleri men ıelenýshileri qatysa alady. Sonymen birge zańnamada zııatkerlik menshik quqyǵyn jáne osyndaı ónimderge baılanysty zııatkerlik qyzmet nátıjelerine quqyq ıelenýshilerdiń quqyqtaryn qorǵaý kózdelgen.
Mundaı platformalardyń qyzmetin retteýdiń negizgi qaǵıdalary Tsıfrlyq kodekstiń 31-babynda bekitilgen. Al osy normalardy is júzinde iske asyrý úshin birqatar zańǵa táýeldi normatıvtik quqyqtyq aktiler engizý kózdelgen. Atap aıtqanda, tsıfrlyq derekter ónimderin almasý jáne aınalymǵa arnalǵan platformalardyń jumys isteý qaǵıdalary, olardy arnaıy tizilimge engizý ólshemsharttary, sondaı-aq tsıfrlyq derekter ónimderiniń qunyn baǵalaýdyń úlgilik ádistemesi kózdelgen.
Buǵan deıin Qazaqstanda tsıfrlyq derekter ónimderin almasý men aınalymǵa shyǵarýǵa arnalǵan alǵashqy tórt platforma memlekettik tizilimge engizilgeni habarlanǵan bolatyn.
