Qazaqstanda tsıfrlyq arhıtektýranyń jańa qaǵıdalary bekitildi: ne ózgeredi
ASTANA. KAZINFORM – Premer-mınıstrdiń orynbasary – jasandy ıntellekt jáne tsıfrlyq damý mınıstri memlekettiń tsıfrlyq arhıtektýrasyn qalyptastyrý, damytý jáne monıtorıng júrgizý qaǵıdalaryn bekitti.
Qujat domendik tásil negizinde memleketti basqarýdyń biryńǵaı tsıfrlyq modelin qalyptastyrý tártibin belgileıdi. Bul arhıtektýra tsıfrlyq obektilerdi, onyń ishinde «Tsıfrlyq úkimet» platformasynda iske asyrylatyn obektilerdi basqarýǵa arnalǵan.
Qaǵıdalarǵa sáıkes, tsıfrlyq arhıtektýrany damytý arhıtektýralyq sheshimderdiń birligine, tsıfrlyq júıelerdiń ózara úılesimdiligine, bultty tehnologııalarǵa daıyndyqqa, modýldik qaǵıdatyna, derekter sapasy men aqparattyq qaýipsizdikti qamtamasyz etýge negizdeledi.
Tsıfrlyq arhıtektýra tórt kezeńmen qalyptastyrylady. Olar – qyzmet arhıtektýrasyn, derekter arhıtektýrasyn, tsıfrlyq obektiler arhıtektýrasyn jáne tsıfrlyq ınfraqurylym arhıtektýrasyn ázirleý.
Bul jumys qoldanystaǵy tsıfrlyq arhıtektýrany taldaýdy, memlekettik basqarý salalary boıynsha damý maqsattary men kórsetkishterin aıqyndaýdy, sondaı-aq maqsatty modeldi ázirleýdi qamtıdy.
Tsıfrlyq arhıtektýrany qalyptastyrý barysynda klıentke baǵdarlanǵan protsester engizilip, memlekettik organdar arasyndaǵy qaıtalanatyn derekter joıylady. Sondaı-aq negizgi derekter tsıfrlyq formatqa kóshirilip, Arhıtektýralyq úılestirý ortalyǵy biryńǵaı arhıtektýralyq baqylaýdy júzege asyrady.
Tsıfrlyq arhıtektýra jobasy daıyn bolǵannan keıin kelisý úshin ýákiletti organǵa joldanady.
Jobany qaraýǵa 10 jumys kúni beriledi. Eger eskertýler bolsa, qujat pysyqtaýǵa qaıtarylady. Ony pysyqtaýǵa 10 jumys kúni bólinedi. Al qaıta qaraý merzimi bes jumys kúninen aspaıdy.
Kelisilgennen keıin memlekettiń tsıfrlyq arhıtektýrasy elektrondyq formatta arhıtektýralyq portalǵa ornalastyrylady.
Memlekettiń tsıfrlyq arhıtektýrasyn qalyptastyrý, damytý jáne monıtorıng júrgizý qaǵıdalaryn engizý týraly buıryq 2026 jylǵy 9 tamyzdan bastap qoldanysqa engiziledi.
Eske salaıyq, buǵan deıin Ónerkásip jáne qurylys mınıstrligi qurylys salasynda tsıfrlyq jobalaýǵa kóshý nátıjesinde jobalardy saraptaý merzimin eki esege deıin qysqartý josparlanyp otyrǵanyn málimdegen edi.
