Qazaqstanda tsıfrlyq aktıvterdi erikti túrde jarııa etý tetigi ázirlenedi
ASTANA. KAZINFORM – Buryn satyp alynǵan aktıvter qazaqstandyq platformalarǵa aýdarylmaq. Bul týraly Úkimet otyrysynda Jasandy ıntellekt jáne tsıfrlyq damý vıtse-mınıstri Ǵızzat Baıtursynov málim etti.
- Bıyl Memleket basshysy «Qazaqstan Respýblıkasynda tsıfrlyq aktıvter ındýstrııasyn yntalandyrý jáne damytý sharalary týraly» Jarlyqqa qol qoıdy. Jarlyqtyń negizgi maqsaty - tsıfrlyq aktıvterdi Qazaqstannyń retteletin naryǵyna tartý. Bizdiń ustanymymyz qarapaıym: tyıym salý emes, retteý. Jarlyqta úsh negizgi baǵyt kózdelgen. Birinshiden, aktıvterdi kóleńkeli naryqtan shyǵarý. Jyl sońyna deıin tsıfrlyq aktıvterdi erikti túrde jarııa etý mehanızmi ázirlenedi. Jeke jáne zańdy tulǵalar buryn óndirilgen nemese satyp alynǵan aktıvterin qazaqstandyq lıtsenzııalanǵan platformalarǵa aýdara alady. Barlyq protsess qarjy monıtorıngi talaptaryna sáıkes júrgiziledi, - dedi Ǵ. Baıtursynov.
Ekinshiden, salyq boıynsha yntalandyrý eskerilgen. Jeke tulǵalar qazaqstandyq provaıderler arqyly júrgizilgen operatsııalar boıynsha jeke tabys salyǵynan bosatylady. Bul norma 2026 jylǵy 1 qańtardan bastap, 2028 jylǵy 31 jeltoqsanǵa deıin qoldanylady. Bul azamattardy sheteldik platformalardan Qazaqstannyń retteletin naryǵyna kóshýge yntalandyrady.
- Úshinshiden, paıdalanylmaı jatqan resýrstardy tsıfrlyq maınıngke tartý qarastyrylǵan. Bul baǵyt ken oryndarynda ilespe munaı gazynan avtonomdy túrde elektr energııasyn óndirýdi kózdeıdi. Búginde keıbir munaı ken oryndarynda óndiriletin ilespe munaı gazy tolyq paıdalanylmaıdy. Onyń bir bóligi jaǵylady nemese jer qoınaýyna qaıta aıdalady.
Osy jaǵdaıdy paıdalana otyryp, ken oryndarynda ilespe gazdan elektr energııasyn alýǵa múmkindik bar. Bul energııany keıin tsıfrlyq maınıngke qoldanýǵa bolady. Búginde Energetıka mınıstrligimen birlesip tıisti mehanızm ázirlendi. Bul turǵyda maıner jer qoınaýyn paıdalanýshymen kelisip, ken ornynyń ózinde avtonomdy elektr stantsııasyn ornata alady. Bul joba biryńǵaı elektr júıesine júkteme túsirmeıdi. Nátıjesinde bos jatqan resýrs ekonomıkalyq aınalymǵa tartylady. Gazdy jaǵý kólemi azaıady. Jańa ınvestıtsııalar men jumys oryndary paıda bolady. Bıýdjetke qosymsha salyq túsedi. Osyndaı tásildi shahta metanyna da qoldaný múmkindigi qarastyrylýda, - dedi vıtse-mınıstr.
Buǵan deıin Qazaqstan paıdalanylmaı jatqan gazdy tsıfrlyq maınıngke qoldanýy múmkin ekenin jazǵan edik.
