Qazaqstanda tsıfrlandyrý baǵytynda qandaı jumystar atqarylyp jatyr – Úkimette otyrys ótti
ASTANA. KAZINFORM - QR Premer-Mınıstriniń birinshi orynbasary Roman Sklıardyń tóraǵalyǵymen ótken Investıtsııalyq ahýaldy jaqsartý jónindegi keńestiń kezekti otyrysynda tsıfrlandyrý boıynsha ózekti máseleler men Qazaqstannyń tsıfrlyq kodeksin ázirleý barysy talqylandy.
QR Úkimeti baspasóz qyzmetiniń habarlaýynsha, Roman Sklıar sońǵy jyldary Qazaqstanda tsıfrlandyrý boıynsha aýqymdy reformalar júrgizilgenin atap ótti. Úkimet tarapynan tsıfrlyq tehnologııalar men jasandy ıntellektini damytý úshin qolaıly jaǵdaılar jasalýda.
Búginde 92% memlekettik qyzmet elektrondy túrde kórsetiledi, onyń 86%-y smartfon arqyly qoljetimdi.
Jasandy ıntellektini el tirshiliginde jappaı qoldaný boıynsha belsendi jumystar júrgizilip jatyr. Onyń negizinde halyqtyń jáne joldaǵy qozǵalystyń qaýipsizdigin qamtamasyz etetin «SERGEK» júıesi jáne avtomattandyrylǵan ınsýlt dıagnostıkasyna arnalǵan «CEREBRA» platformasy jáne medmekemeler júıelerine arnalǵan «Forus Data» jumys isteıdi.
NVIDIA, Coursera, Amazon, Microsoft jáne Google kompanııalarymen birlese jasandy ıntellekt jáne mashınalyq oqytý boıynsha tegin sertıfıkat beriletin oqytý baǵdarlamalary júzege asyrylyp jatyr.
Sondaı-aq Qazaqstan tsıfrlyq álemdegi jańa Jibek jolynyń basty qatysýshysy bolýǵa umtylady.
Bul baǵyttaǵy basty qujat – eldi tsıfrlandyrýdyń negizgi prıntsıpteri belgilengen Tsıfrlyq kodeks bolmaq. Ol tsıfrlyq tehnologııalardy, onyń ishinde jasandy ıntellektti retteýdiń jańa tásilderin engizýge, azamattar men bıznes úshin qaýipsiz jáne jaıly tsıfrlyq orta qurýǵa múmkindik beredi.
Otyrys barysynda Qazaqstandaǵy Amerıka saýda palatasynyń atqarýshy dırektory Dorıs Bredberı, Ulybrıtanııanyń Qazaqstandaǵy Tótenshe jáne Ókiletti elshisi Ketı Lıch, Italııanyń Qazaqstandaǵy Tótenshe jáne Ókiletti elshisi Marko Albertı, EQDB Ortalyq Azııa boıynsha basqarýshy dırektory Hýseın Ozhan, Dúnıejúzilik banktiń Qazaqstandaǵy turaqty ókili Andreı Mıhnev, sondaı-aq Dentons, Microsoft jáne Google kompanııalarynyń ókilderi baıandama jasady.
Tsıfrlyq kodeksti ázirleý boıynsha júrgizilip jatqan jumystarǵa qatysty tsıfrlyq damý, ınnovatsııalar jáne aeroǵarysh ónerkásibi birinshi vıtse-mınıstri Qanysh Tóleýshın túsinikteme jasady.
Keńes otyrysyn qorytyndylaı kele, Roman Sklıar Qazaqstan Úkimeti ózara tıimdi seriktestik qurýǵa baǵyttalǵan talqylaýlarǵa, usynystar men jańa jobalarǵa daıyn jáne ashyq ekenin atap ótti.
Sonymen qatar Premer-Mınıstrdiń birinshi orynbasary elimizde tsıfrlyq tehnologııalardy ári qaraı damytý boıynsha aıtylǵan barlyq keńes pen usynysty pysyqtaýdy tapsyrdy.
