Qazaqstanda tis julý men ony emdeý quny qansha turady
Sońǵy kezderi elimizde stomatologııa qyzmetine suranys artpasa, tómendemedi. El aýzynda ambýlatorlyq em arasyndaǵy baǵasy joǵary osy sala dep aıtylǵanymen, tisin julyp, emdetetinder, túzetip, aǵartatyndar jetip artylady. Qazaqstanda tis emdetý, juldyrý quny qansha turady? Kazinform agenttiginiń tilshisi anyqtap bildi.
Tis juldyrý quny eń «arzan» óńir — Petropavl. Munda baǵa 4000 teńgeden bastalady. Sonymen birge emdetý quny ózgelerge qaraǵanda tómen. 7 000-15 000 teńge aralyǵynda dep kórsetiledi.
Túrkistanda tis julý quny 5 000 teńgeden bastalady. Al emdetý 10 000 teńgeden joǵary. Óskemen, Pavlodar, Qyzylorda, Aqtóbe jáne Qonaev qalalarynda tis juldyrý quny shamamen 5000-5500 teńge. Al emdetý jaıyna keler bolsaq, Óskemen men Pavlodarda 6000 teńgeden bastalady. Qonaevta 10 000 teńgeden bastalyp, qymbattaı beredi. Qyzylordalyqtar tis emdetý úshin 15 000 teńge jumsaıdy. Al Aqtóbede bul qyzmet túri 20 000 teńgeden bastalady.
Semeıde tis julý úshin stomatologııaǵa 5500-6000 teńge (aqyl tisti julý 13 500 teńgeden bastalady) qajet. Al terapevt qyzmeti, ıaǵnı, emdeý 12 000 teńgeden bastalady.
Qostanaı men Atyraýda tis jylý quny 7000 teńgeden bastalyp tur. Qostanaıda qurt jegen tisti emdeý úshin 12 000–27 000 teńge, Atyraýda 15 000 teńge qajet.
Kókshetaý, Qaraǵandy, Jezqazǵan jáne Taldyqorǵanda tis juldyrý quny 8000-9000 teńge turady. Tisti saqtap qalyp, emdetý Taldyqorǵanda 6500, Qaraǵandyda 9500, Kókshetaýda 13 000 teńgeden bastalady.
Al jezqazǵandyqtar tisin 10 000 — 15 000 teńgege emdetedi. Taraz turǵyndary úshin tis julý jáne emdeý quny shamamen 8 000 — 20 000 teńge. Qyzmet quny julý men emdeýdiń kúrdeliligine baılanysty bolyp keledi.
Astanada tis julý quny 9000 teńgeden bastalady. Al emdeý quny 14 000 — 30 000 teńge. Shymkentte julý qyzmetiniń baǵasy 10 000 teńge bolsa, emdeý 18 000 — 20 000 teńge. Munda da tis julý men emdeý quny kúrdeliligine baılanysty ózgerip otyrady.
Oral turǵyndary tisin juldyrý úshin 10 500 teńge tóleıdi. Al em júrgizý, óz tisin saqtap qalý quny — 16 000 teńge.
Almatyda stomatologtar tisti 11 00 (aqyl tisti 17 500) teńgege julyp beredi. Al emdeý úshin 12 500 teńgeden bastalatyn qyzmet túrin usynady.
Elimizde eń qymbat stomatologııalyq qyzmet túri Aqtaýda bolyp tur. Munda tis julý 15 000, al emdeý 20 000 teńgeden bastalady.
Buǵan deıin habarlanǵandaı, kelesi jyldan bastap mektepterde stomatologııa kabınetteri ashylady.
