Qazaqstanda tirkelgen zańdy tulǵalar sany 550 myńnan asady

ASTANA. KAZINFORM – 2026 jylǵy 1 aqpandaǵy jaǵdaı boıynsha Qazaqstanda 550 204 zańdy tulǵa tirkelgen, onyń 438 787-si – jumys istep turǵan sýbektiler. Bul týraly Ulttyq statıstıka bıýrosy habarlady. 

2026 jylǵy qańtarda 2025 jylǵy jeltoqsanmen salystyrǵanda zańdy tulǵalar sany 0,1% artty, al ótken jyldyń sáıkes kezeńimen salystyrǵandaǵy ósim 2,5%-dy quraǵan. 2016-2025 jyldar aralyǵynda olardyń sany 383 850-den 549 669-ǵa deıin ósip, 43,2% ulǵaıdy. 

Tirkelgen zańdy tulǵalardyń eń joǵary úlesi myna salalarǵa tıesili:

- «Kóterme jáne bólshek saýda; avtomobılder men mototsıklderdi jóndeý» – 26,7% 

- «Qurylys» – 13,4%

- «Ózge de qyzmet túrlerin kórsetý» – 9,9% 

Tirkelgen zańdy tulǵalar sany basym aımaqtar – Almaty (28,8%), Astana (19,5%) jáne Shymkent (5,5%).

Osyǵan deıin zańdy tulǵalardyń jemqorlyq qylmystaryna jaýapkershiligi kúsheıtiletinin jazǵan edik.