Qazaqstanda tirkelgen tyrysqaq aýrýynyń oshaǵy joıyldy
ASTANA. KAZINFORM – Qazaqstan Respýblıkasynyń sanıtarııalyq-epıdemıologııalyq qyzmeti Delı-Almaty baǵyty boıynsha Air Astana avıakompanııasy reısiniń bortynda tirkelgen tyrysqaq jaǵdaıy oshaǵynyń sátti joıylǵandyǵy týraly habarlady.
Sanıtarııalyq-epıdemıologııalyq qyzmet mamandarynyń jedel is-qımyldary el ishinde tyrysqaqtyń taralýyn boldyrmaı, ınfektsııany ýaqtyly anyqtaýǵa jáne oqshaýlaýǵa múmkindik berdi.
«Baılanysta bolǵan adamdardyń zerthanalyq zertteýleriniń nátıjeleri — teris, 154 adamnan medıtsınalyq baqylaý alynyp tastaldy. Syrqattanǵan Qyrǵyz Respýblıkasynyń azamaty emdelýden sátti ótip, jaqsy nátıjemen statsıonardan shyǵaryldy. Qazirgi ýaqytta ol Bishkek qalasyna ketti. Halyqqa, ásirese Úndistan, Aýǵanstan men Pákistan sekildi elderdi qosa alǵanda, tyrysqaqpen syrqattanýshylyq joǵary Afrıka men Azııanyń keıbir óńirlerine saparlaýdy josparlap otyrǵan adamdarǵa usynym berý mańyzdy», — delingen habarlamada.
Densaýlyq saqtaý mınıstrligi kelesideı nusqaýlyqty usynyp, keńes beredi:
• Tek qaınatylǵan nemese bótelkedegi sýdy ishý;
• Sýsyndardy salqyndatý úshin muzdy paıdalanbaý;
• Tutynar aldynda ónimderdi tıisti termııalyq óńdeýdi júrgizý;
• Jemister men kókónisterdi tek qaınatylǵan nemese bótelkedegi sýda jýý.
• Qol gıgıenasyn saqtaý, olardy ár tamaq aldynda jáne dárethanaǵa barǵannan keıin sabynmen jýý;
• Sýdyń aýzǵa ketýine jol bermeı, tek ruqsat etilgen sý aıdyndarynda shomylý.
• Aýrýdyń alǵashqy belgileri paıda bolǵan kezde ózin-ózi emdeýden aýlaq bolyp, dereý medıtsınalyq kómekke júginý.
QR Densaýlyq saqtaý mınıstrligi jaǵdaıdy baqylaýdy jalǵastyrady. El turǵyndarynyń densaýlyǵyn saqtaý úshin barlyq qajetti sharalardy qabyldaıdy.
«Biz azamattardy saıahat kezinde saqtyq sharalaryn saqtaýǵa shaqyramyz. Densaýlyqty saqtańyzdar, muqııat bolyńyz jáne medıtsınalyq mamandardyń usynymdaryn oryndańyz», - dep eskertedi.
