Qazaqstanda tirkelgen 180 sport túriniń tek 60-tan astamy ǵana basym baǵyt retinde aıqyndaldy
ASTANA. KAZINFORM – 16 maýsymda «Dene shynyqtyrý jáne sport týraly» jańartylǵan zań jobasy kúshine endi. Qujattaǵy basty jańalyqtardyń biri – joǵary jetistikter sportyn irikteýdiń jańa ólshemsharttaryn engizý jáne «basym sport túrleri» uǵymyn zańmen bekitý. Bul týraly Týrızm jáne sport mınıstrligi málim etti.
Vedomstvonyń dereginshe, zań talaptaryna sáıkes, elimizde tirkelgen 180 sport túriniń tek 60-tan astamy ǵana basym baǵyt retinde aıqyndaldy. Bul tizim ulttyq qurama komandalarynyń Olımpıada, Paralımpıada, Sýrdlımpıada, Azııa jáne Azııa Para oıyndaryndaǵy nátıjeleri negizinde jasalady.
— Jańa erejeniń maqsaty — el sportshylarynyń básekege qabilettiligin arttyrý, bıýdjet qarajatyn tıimdi josparlaý jáne ulttyq quramalardyń daıyndyǵynda naqty basymdyqtardy anyqtaý, — delingen habarlamada.
Buǵan deıin barlyq sport túri úsh topqa bólinip, eki jylda bir ret reıtıng nátıjeleri boıynsha saralanatyn. Qarjylandyrý mynadaı tártippen júzege asyrylyp keldi:
«A» toby — reıtıngte joǵary upaı jınaǵan, belsendi damyp jatqan sport túrleri;
«V» toby — ortasha upaıǵa ıe, damý áleýeti bar sport túrleri;
«S» toby — upaıy tómen, damý múmkindigi shekteýli sport túrleri.
Sondaı-aq buǵan deıin ár óńir óz múmkindigine qaraı basym sport túrlerin derbes anyqtap, damý tetikterin ózderi ázirleıtin. Al jańa zańnamaǵa sáıkes, basym sport túrleriniń tizimin bekitý quzyreti Týrızm jáne sport mınıstrligine berildi. Bul — elimizde joǵary jetistikter sportyn damytýdyń keshendi jáne birizdi júıesin qalyptastyrýǵa jol ashady.
Aıta keteıik, buǵan deıin Prezıdent 2025 jylǵy 15 sáýirde qol qoıǵan «QR keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańyna sáıkes, legıonerlerge bıýdjetten qarjy bólinbeıtin boldy.