Qazaqstanda trıatlon quramasy qalyptastyrylady
ASTANA. QazAqparat - "Altyn Adam Triathlon 2016" chempıonatynyń qorytyndysymen trıatlonnan Qazaqstan quramasy qalyptastyrylady, dep habarlady federatsııanyń baspasóz qyzmeti.
Qapshaǵaı sý qoımasynda kásipqoılar men áýesqoılar arasynda trıatlonnan "Altyn Adam Triathlon 2016" Qazaqstan chempıonaty ótti.
Jarysqa Qazaqstannan, Ýkraına men Qyrǵyzstannan 200-den astam sportshy qatysty. Qazaqstan Respýblıkasynyń trıatlonnan Ulttyq quramasyndaǵy qurmetti oryn úshin kásipqoılar Sprint jáne Super Sprint qashyqtyqtarynda saıysqa tústi.
«Búgin elimizdiń Ulttyq quramasyna irikteý ótti. Biz áleýetti bolashaq chempıondardy kórdik, biz olardyń saıysqa degen joǵary jaýapkershiligin sezindik Men jas urpaqtyń otandyq trıatlonnyń keleshegine, óz jattyqtyrýshylaryna, óz eline degen senimi úshin rızamyn», - dedi Qazaqstandyq trıatlon federatsııasynyń prezıdenti Murathan Toqmadı.
Jarystar nátıjesimen qyrkúıekte komandanyń túpkilikti quramy jarııalanady. Onyń negizinde QTF basshylary men quramanyń bas jattyqtyrýshysy Álimbaı Dándibaı árbir sportshyny kelesi olımpıadalyq oıyndarǵa ázirleýdiń jeke josparyn jasaýǵa kirisedi.
«Biz ótip bara jatqan jazdyń sońǵy sóresine úlken ázirlik júrgizdik. Olardyń kóńil-kúıi men sergektigi - óte jaqsy. Jyl asqan saıyn jarystar kóbeıip keledi, jarystardy uıymdastyrý jáne sportshylardy daıarlaý satysy arta túsýde. Biz qazaqstandyq sportshylar halyqaralyq jarystarda joǵary oryndarǵa úmitker bola alady dep senemiz. Alda bizdi dýatlon kútip tur, jarystar qorytyndylary shyǵarylady», dedi Qazaqstandyq trıatlon federatsııasynyń vıtse-prezıdenti Gadjı Gadjıev.
Qazaqstandaǵy jarystarǵa álemdik trıatlon juldyzy, trıatlonnan úsh márte álem chempıony Paul Amey alǵash ret keldi.
Sport áýesqoılary arasynda jas adamdarmen qatar 60-tan asqan qarııalar da bar. Máselen, «Altyn adam» áýesqoılar chempıonatynda eń jas trıanlonshy.Ásııat Gadjıeva men Danııl Porodnov óz jas sanatynda birinshi oryndarǵa ıe boldy.
Qazaqstan trıatlon chempıonatynda PRO sanatyndaǵy Sprint qashyqtyǵynda erler arasynda Daryn Qonysbaev, Sergeı Kýrochkın, Azamat Kembilov, Vıtalıı Belov jeńiske jetti. Qyzdar arasynda Ekaterına Shatnaıa, Arýjan Amanjolova, Áıgerim Shyńǵysbek birinshi oryndarǵa ıe boldy.
